जळगाव राजमुद्रा दर्पण | १० वर्षाच्या संसारातील कौटुंबिक वादाला कंटाळून जळगाव शहरात विवाहितेने आत्महत्या केली. शहरातली सत्यमपार्क भागात कौटुंबिक जाचाला कंटाळून पिडीतेने गळफास घेऊन जगाचा निरोप घेतला. याप्रकरणी जळगाव तालुका पोलिसात अकस्मात मृत्यूची नोंद करण्यात आली आहे.
सुनिता शरद पाटील (वय-३०) असे गळफास घेतलेल्या विवाहितेचे नाव आहे.सुनिता पाटील आणि तिचे पती शरद मंगल पाटील यांच्यात गेल्या १० वर्षांपासून कौटुंबिक वाद आहेत. दरम्यान, दोघांचा संसार सुरळीत व्हावा यासाठी अनेकांनी मनोमिलनाचा प्रयत्न केला. परंतू, शरद पाटील हा विवाहितेला मारहाण करत असल्याने त्या विभक्त राहत होत्या. विवाहिता सुनिता पाटील या खोटेनगरातील सत्यमपार्क येथे लहान मुलगा आयुषसोबत राहत होत्या. तर पती शरद पाटील हा त्याचे आईवडील आणि मोठा मुलगा वेदांतसोबत पिंपळकोठा येथे वास्तव्यास आहे. दोन दिवसांपूर्वी शरद पाटील याने रागाच्या भरात सत्यमपार्क येथे येऊन घरातील सामानाला आग लावली. यात विवाहितेचे संसारोपयोगी वस्तू जळून खाक झाल्या. विवाहितेचे आईवडील यांच्याकडे सुनिता पाटील यांचा लहान मुलगा आयुष देखील राहतो. विवाहिता शुक्रवार १३ मे रोजी रात्री घरी एकट्याच होत्या. मध्यरात्री विवाहितेने गळफास घेवून आत्महत्या केली. दरम्यान, शनिवारी १४ मे रोजी सकाळी १० वाजता विवाहितेची आई बेबीबाई भाईदास पाटील या मुलीला डबा देण्यासाठी तिच्या घरी सत्यमपार्क येथे आल्या असता त्यांना मुलगी गळफास घेतलेल्या अवस्थेत आढळून आली. मुलीचा मृतदेह पाहून त्यांनी टाहो फोडला.
या घटनेची माहिती मिळाल्यानंतर तालुका पोलीस ठाण्याचे पोलीस निरीक्षक रामकृष्ण कुंभार, सपोनि गणेश सायकर, वासूदेव पाटील, सतिश हारनोळ, संजय भालेराव यांनी घटनास्थळी धाव घेवून पंचनामा केला. मृतदेह खाली उतरवून जिल्हा शासकीय वैद्यकीय महाविद्यालयात आणण्यात आला. विवाहितेने आत्महत्या केली नसून तिचा पती शरद पाटील यानेच तिला गळफास देवून खून केल्याचा आरोप मृत विवाहितेची आई बेबीबाई पाटील यांनी केला आहे. याप्रकरणी जळगाव तालुका पोलीस ठाण्यात अकस्मात मृत्यूची नोंद करण्यात आली आहे.
