पुणे : तरुणांच्या बेरोजगारीचा गैरफायदा घेऊन त्यांना नोकरीचे आमिष दाखवून फसवणुकीचे प्रकार वाढीस लागले आहे. पुण्यात असाच एक प्रकार उघडकीस आला असून, एका तरुणास साडेपाच लाखांचा गंडा घातला आहे. पनवेल महापालिकेत नोकरीला लावतो, असे आश्वासन देऊन तरुणाकडून साडेपाच लाख रुपये घेऊन त्याची फसवणूक केली. याप्रकरणी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, नागेश तानाजी जगताप (वय 32, रा. तळेगाव दाभाडे) यांनी तळेगाव दाभाडे पोलीस ठाण्यात फिर्याद दिली. त्यानुसार पोलिसांनी संदीप मारुती पांडव (वय 30, रा. नवी मुंबई), जगन्नाथ बालकृष्ण (वय 37, रा. जुईनगर, ठाणे), नितीन महादू वाघ (वय 38, उल्वे, नवी मुंबई) यांना अटक केली आहे. आरोपींनी तरुणाला पनवेल महापालिकेचे बनावट ओळखपत्र देखील दिले होते. ही घटना 3 डिसेंबर 2021 ते 10 नोव्हेंबर 2022 या कालावधीत तळेगाव दाभाडे येथे घडली.
दीड लाख रुपये केले परत
सदरील आरोपींनी आपापसांत संगनमत करून फिर्यादीस पनवेल महापालिकेत भरारी पथकामध्ये नोकरी लावतो, असे आमिष दाखवले. त्यासोबतच नोकरी लावण्याकरिता डिपॉझीट म्हणून फिर्यादीकडून पाच लाख रुपये तसेच फी म्हणून 50 हजार रुपये असे साडेपाच लाख रुपये घेतले. आरोपींनी फिर्यादीच्या नावे पनवेल महापालिकेचे बनावट ओळखपत्र बनवून दिले. मात्र, प्रत्यक्षात नोकरी न देता फसवणूक केली. फिर्यादीने पैशांची मागणी केली असता दीड लाख रुपये परत करत चार लाख रुपयांची फसवणूक केली.
