एरंडोल: भरधाव वेगाने जाणाऱ्या ट्रक चालकाचे नियंत्रण सुटल्याने ट्रक रस्त्याच्या विरुद्ध दिशेला असलेल्या झाडाला जोरदार धडकला. त्यात चालक व क्लीनर हे दोघे ठार झाल्याची घटना एरंडोल तालुक्यातील उमरदे गावाच्या खदानीजवळ घडली.
याबाबत सविस्तर वृत्त असे की, खदानी जवळ म्हसावद कडून एरंडोलकडे लोखंडी सळ्यांनी भरलेला ट्रक (एमपी ११, एच ०८५२) भरधाव वेगाने जात होता. यानंतर ट्रक चालकाचे ट्रकवरील नियंत्रण सुटल्याने हा रस्त्याच्या विरुद्ध दिशेला जाऊन झाडावर आदळला. त्यामुळे ट्रकचा समोरील भाग चक्काचूर होऊन ट्रक पलटी झाला. यावेळी स्थानिकांनी घटनास्थळी धाव घेऊन मदतकार्य केले. या अपघाताची तात्काळ १०८ क्रमांकाला व एरंडोल पोलिसांना माहिती देण्यात आली.
जखमींचा रुग्णालयात मृत्यू
ग्रामस्थांनी जखमी क्लीनर शाहरुख खान याला रुग्णवाहिकेने ग्रामीण रुग्णालयात दाखल केले. त्यानंतर क्रेन बोलून ट्रक चालक प्रकाश गंगाराम बासकले याची क्रेनच्या साह्याने झाड बाजूला करून सुटका केली, तेव्हा तो बेशुद्ध अवस्थेत होता. त्यालाही एरंडोल ग्रामीण रुग्णालयात औषध उपचारासाठी रवाना करण्यात आले. ग्रामीण रुग्णालयात प्राथमिक उपचारानंतर शाहरुख खान याला जळगाव सामान्य रुग्णालयात दाखल करण्यात आले. उपचारादरम्यान त्याचा मृत्यू झाला तर चालक प्रकाश बासकले याचे ग्रामीण रुग्णालयात निधन झाले. या प्रकरणी गुन्ह्याची नोंद करण्यात आली आहे.
