पुणे : राष्ट्रीय संरक्षण प्रबोधिनीत (NDA) नोकरी लावणे, तसेच इलेक्ट्रीक वर्क टेंडर मिळवून देण्याच्या आमिषाने चौघांची 28 लाखांची फसवणूक करण्यात आल्याचा प्रकार उघडकीस आला आहे. या प्रकरणी सिंहगड रस्ता पोलिसांनी दोघांविरुद्ध गुन्हा दाखल केला आहे.
पोलिसांनी दिलेल्या माहितीनुसार, विजय साखरे (वय 42, रा. भूमकर चौक, नऱ्हे) सिंहगड रोड पोलिसांकडे फिर्याद दिली आहे. त्यानुसार प्रसाद गोविंद वझे (रा. लक्ष्मी पार्क सोसायटी, कोंढवे धावडे), परमेश्वर अंकुश शिंदे (रा. ब्रम्हा हॉटेलसमोर, सिंहगड रस्ता) यांच्यावर गुन्हा दाखल करण्यात आला आहे. आरोपी शिंदे याचा प्रवासी वाहतुकीसाठी गाड्या पुरविण्याचा व्यवसाय आहे. आरोपी वझे याची एनडीएतील उच्चपदस्थ अधिकाऱ्यांशी ओळख असल्याची बतावणी शिंदे याने साखरे यांच्याकडे केली होती. वझे एनडीएत कायमस्वरुपी लिपिक पदावर नोकरी लावून देतील, तसेच ओळखीतून विद्युत विषयक कामाचा ठेका मिळवून देतील, असे आमिष आरोपी शिंदेने त्यांना दाखविले होते.
सिंहगड पोलिसांकडून तपास सुरु
साखरे यांच्या पत्नीला एनडीएत नोकरीचे आमिष दाखवून आरोपी शिंदे आणि वझे यांनी जाळ्यात ओढले. कायमस्वरुपी नोकरी लावून देण्यासाठी साखरेकडे 8 लाख रुपयांची मागणी केली. यानंतर साखरे आणि त्यांच्या तीन नातेवाईकांनी वझे आणि शिंदेला 28 लाख रुपये दिले. त्यानंतर त्यांना नोकरी लावून दिली नाही, तसेच विद्युतविषयक कामाचा ठेकाही मिळवून दिला नाही. फसवणूक झाल्याचे लक्षात आल्यानंतर साखरे यांनी पोलिसात तक्रार दिली आहे. सहायक पोलीस निरीक्षक प्रवीण जाधव तपास करत आहेत.
