हरयाणाच्या फरीदाबाद येथे भीषण दुर्घटना घडली, त्यामध्ये ६ जणांचा मृत्यू झाला. विशेष म्हणजे हे सहाही जण एमेकांचे मित्र असून मित्राचा वाढदिवस साजरा करण्यासाठी जात असतानाच हा अपघात झाला. पाली गावाजवळ या युवकांच्या कारने एका डंपरला धडक दिली. ज्यामध्ये कारचा चेंदामेंदा झाला असून कारमधील ६ जणांचा मृत्यू झाला.
अपघाताची माहिती मिळताच स्थानिकांनी तातडीने घटनास्थळी धाव घेतली होती. त्यानंतर, अपघात कारमधील युवकांना तात्काळ जवळील रुग्णालयातही नेले, मात्र डॉक्टरांना सर्वांनाच मृत घोषित केले. जतिन छाबड़ा, पुनीत मंगला, संदीप वाडिया, नोनू गुलाटी, विशाल सेठी आणि संदीप अशी मृतांची नावे आहेत. सर्वचजण पलवल कँप आणि जवाहर नगरमध्ये राहत होते.
वाढदिवस सेलिब्रेशनसाठी जात होते
या सर्व युवकांचे वय १८ ते २५ वर्षे वयाचे होते. त्यामुळे, संपूर्ण पलवलमध्ये शोककळा पसरली असून हळहळ व्यक्त होत आहे. आपला मित्र रिंकूचा वाढदिवस साजरा करण्यासाठी हे सर्व मित्र गुरुग्रामला जात असताना ही भीषण दुर्घटना घडली. या घटनेनं कुटुंबीयांवर मोठा आघात झाला असून यांच्या सर्व मित्रांनाही धक्का बसलाय.
