जळगाव : पेट्रोलपंपावर एकाने बंदुकीचा धाक दाखवून ३६ हजार रुपये लुटल्याची घटना अमळने तालुक्यातील डांगर शिवारात गुरुवारी मध्यरात्रीच्या सुमारास घडली.
अमळनेर तालुक्यातील डांगर शिवारातील पांडुरंग पेट्रोलपंपावर काळ्या रंगाच्या रुमालाने चेहरा बांधलेला एक जण आला. त्याने पंपावरील कर्मचाऱ्यांना झोपेतून उठविले. त्याच्याकडील बंदुकीचा धाक दाखवत पेट्रोल- डिझेल विक्रीचे पैसे हिसकावून घेतले. त्याचवेळी एक जण चारचाकी घेऊन पेट्रोल भरण्यासाठी पंपावर आला. या लुटारूने त्याच्या त्या वाहनाच्या डीकीला लाथा मारून चालकास बाहेर निघण्यास भाग पाडले. त्यालाही बंदुकीचा धाक दाखवत मारहाण केली व त्याच्याजवळ असलेले पाकीट हिसकावून तो अमळनेर रस्त्याकडे गेला. त्याचवेळी त्याचा साथीदार मोटरसायकल घेऊन आला. दोघे मोटरसायकलने धुळ्याकडे पसार झाले. याबाबत नरेंद्र सोनसिंग पवार (रा. रणाइचे, ता. अमळनेर) याने अमळनेर पोलिसात दिलेल्या फिर्यादीवरून अज्ञात दोन जणांविरुद्ध गुन्हा दाखल करण्यात आला आहे. पुढील तपास पोलिस उपनिरीक्षक विकास शिरोळे करीत आहेत.
घटनास्थळी पोलिस अधीक्षकांनी दिली भेट
पेट्रोलपंपावरील कर्मचारी नरेंद्र सोनसिंग पवार याच्याकडून १३ हजार, किशोर रवींद्र पाटील याच्याकडून १४ हजार व डिझेल टाकण्यासाठी आलेल्या संजय दिलीप भामरे याच्याकडून नऊ हजार रुपये असा एकूण ३६ हजार ५०० रुपये या चोरट्याने हिसकावून नेले. घटनास्थळी पोलिस अधीक्षक एम. राजकुमार, अपर पोलिस अधीक्षक रमेश चोपडे, डीवायएसपी राकेश जाधव, पोलिस निरीक्षक विजय शिंदे यांनी भेट दिली.
