जळगाव : मंत्रालयात सरकारी नोकरी लावून देतो, असे आमिष दाखवत खोटी आर्डर दाखवून जळगावातील एकाची तब्बल 22 लाखात फसवणूक करण्यात आली. या प्रकरणी तीन जणांविरोधात रामानंदनगर पोलीस ठाण्यात गुन्हा दाखल करण्यात आल्याने खळबळ उडाली आहे.
जळगाव शहरातील शिवकॉलनी येथे प्रवीणचंद पांडूरंग दिघोळे हे आपल्या परीवारासह वास्तव्याला असून ते युनायटेड इन्शुरन्समध्ये नोकरीला आहेत. त्यांची धुळ्यातील मित्र चंद्रभान जवरीलाल ओसवाल व त्याचा लहान भाऊ अनिल जवरीलाल ओसवाल यांच्याशी 15 वर्षापासून ओळख आहे. त्यानुसार प्रवीणचंद दिघोळे यांचा मुलगा राजकुमार दिघोळे याला मंत्रालयात चांगल्या पदावर नोकरी लावून देतो, आमची मोठ्या पदावरील अधिकार्‍यांशी ओळख असल्याचे भासवून नोकरी लावण्यासाठी 22 लाख रुपये लागतील, असे ओसवाल बंधूंनी सांगितले.
पैसे देऊनही जॉइनिंग ऑर्डर मिळेना
त्यानुसार 10 मे 2018 रोजी प्रवीणचंद दिघोळे यांनी शिवकॉलनी येथे त्यांच्या घरी प्रवीणचंद दिघोळे यांनी सुरूवातीला नऊ लाख रुपये दिले. उर्वरीत पैसे लवकर देण्याचे सांगितले. त्यानुसार प्रवीणचंद यांनी पैशांची जुळवाजुळव करत 27 मे 2018 रोजी पुन्हा 7 लाख रुपये दिले. दरम्यान, नोकरीसाठी जॉईनिंग ऑर्डरची दिली नाही म्हणून ओसवाल बंधुंना फोन केला असता दरवेळी वेगवेगळे कारण सांगून टाळाटाळ करण्यात आली. त्यानंतर 16 फेब्रुवारी 2021 रोजी मंत्रालय मुंबईच्या नावाची झेरॉक्स ऑर्डर दाखवण्यात आली व मुंबईल जावून नोकरीला सुरूवात करू, असे सांगण्यात आले मात्र मुंबईत गेल्याने साहेब आजारी असल्याचे सांगून पुन्हा त्यांना परत आणण्यात आले.
पुन्हा उकळले सहा लाख
त्यानंतर मुंबईला चंद्रभान ओसवाल आणि त्याचा मित्र हरताली प्रसाद रोहिदास यांनी बोलावून मुलाला दुसरीकडे ज्यु.इंजिनिअर म्हणून नोकरी लावून देतो असे सांगून उर्वरीत सहा लाखांची मागणी केल्याने प्रवीणचंद यांनी ऑनलाईन पध्दतीने उर्वरित रक्कम ट्रान्सफर केली. परंतु नोकरीचे लावण्यासंदर्भात कोणतीही ऑर्डर किंवा नोकरी लागली नाही. नोकरी द्या किंवा रक्कम परत द्या, असे सांगितल्यानंतर चेक देण्यात आले मात्र ते बँकेत वटले नाहीत.
तिघांविरोधात गुन्हा दाखल
आपली फसवणूक झाल्याचे लक्षात आल्यानंतर त्यांनी रामानंद नगर पोलीस ठाण्यात धाव घेवून तक्रार दिल्याने चंद्रभान जवरीलाल ओसवाल, अनिल जवरीलाल ओसवाल आणि हरताली प्रसाद रोहिदास (पत्ता माहित नाही) यांच्या विरोधात रामानंदनगर पोलीस ठाण्यात गुन्हा दाखल करण्यात आला. महिला पोलीस हेड कॉन्स्टेबल उषा सोनवणे तपास करीत आहे.
