राजमुद्रा : महाराष्ट्र विधानसभा निवडणुकीच्या निमित्ताने काही दिवसांपासून सुरू असलेला प्रचार आता शेवटच्या टप्प्यात आला आहे. निवडणूक प्रचारासाठी जेमतेम काही दिवस शिल्लक असल्याने सत्ताधारी महायुती आणि विरोधी महाविकास आघाडीने आक्रमक प्रचारावर भर दिला आहे. परिणामी राज्यात आरोप – प्रत्यारोपांना धार चढली असून या धुमश्चक्रीमुळे राज्यातील राजकीय वातावरण चांगलेच तापले आहे. या पार्श्वभूमीवरच भाजपचे वरिष्ठ नेते अमित शाह यांची गडचिरोलीत सभा होणार आहे. मुंबईतील वांद्रे भागातील बीकेसी मैदानावर शिवसेना ठाकरे गटाचे पक्षप्रमुख उद्धव ठाकरे यांची सभा होणार आहे. तसेच काँग्रेस नेत्या प्रियांका गांधी यांचीही गडचिरोलीत सभा होणार आहे. याच बरोबर मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार यांच्यासह महाविकास आघाडीच्या नेत्यांच्या सभा होणार आहेत . त्यामुळे या सभांमधून नेते मतदारांना काय साद घालणार हे पाहणं महत्वाचं असणार आहे.
गडचिरोली जिल्ह्यात आज महायुतीचे विरुद्ध महाविकास आघाडीच्या ज्येष्ठ नेत्यांची आज सभा होणार आहे..केंद्रीय गृहमंत्री, भाजपचे वरिष्ठ नेते अमित शाह यांची आज प्रचार सभा होणार आहे. गडचिरोली जिल्ह्यातील गडचिरोली आरमोरी अहेरी या तीन मतदार संघाच्या प्रचारासाठी आज गडचिरोली अमित शाह दाखल होणार आहेत. अकरा वाजता मतदारांना संबोधित करणार आहेत. मागच्या 2019 च्या निवडणुकीनंतर या निवडणुकीत अमित शाह पहिल्यांदाच गडचिरोलीत येणार आहेत. शिवाजी महाविद्यालयाच्या प्रांगणावर प्रचार सभा होणार आहे. तर याच मतदारसंघात दुसरीकडे काँग्रेस पक्षाच्या नेत्या प्रियांका गांधी देसाईगंज येथे प्रचार सभा होणार आहे. प्रियांका गांधी यांची गडचिरोली जिल्ह्यात या निवडणुकीत पहिलीच सभा देसाईगंज इथं होणार आहे. त्यामुळे या सभेतून त्या कोणावर रोख ठेवणार हे पाहणं महत्वाचं ठरणार आहे..
मुख्यमंत्री एकनाथ शिंदे यांच्याही आज सभा होणार आहेत. अक्कलकुवा विधानसभा मतदारसंघातील महायुतीचे उमेदवाराच्या प्रचारार्थ प्रचारसभेला शिंदे उपस्थित असणार आहेत. साक्री, मालेगाव बाह्य विधानसभा मतदारसंघ, नांदगाव, भांडुप, भायखळा या ठिकाणी शिंदेंच्या सभा होणार आहेत.उपमुख्यमंत्री देवेंद्र फडणवीस यांची नागपूर दक्षिण-पश्चिम मतदारसंघात सभा होणार आहे. चांदवड, नाशिक पूर्व, नाशिक मध्य आणि नाशिक पश्चिम, इचलकरंजी विधानसभा मतदारसंघांमध्ये देवेंद्र फडणवीस यांची सभा होणार आहे. राष्ट्रवादी काँग्रेस पार्टीचे बारामती विधानसभेचे उमेदवार, उपमुख्यमंत्री अजित पवार यांचा आज गाव भेट दौरा करणार आहेत. निवडणुका काही दिवसांवर येऊन ठेपल्या असताना राजकीय नेते प्रचारातून काय मतदारांना साद घालणार याकडे राजकीय वर्तुळाचे लक्ष लागले आहे..
