राजमुद्रा वृत्तसेवा | शिवसैनिकांनी माझ्या गाडीवर दगडफेक केल्याचा आरोप भाजपाचे नेते किरीट सोमय्या यांनी केला आहे. सोमय्या यांनी आपल्या गाडीचे दोन फोटो पोस्ट केले आहेत. या फोटोंमध्ये गाडीवर शाई फेकण्यात आल्याचं दिसत आहे. सोमय्या यांनी शिवसेनेच्या कार्यकर्त्यांनी हे केल्याचा आरोप करत त्यांना गुंड असं म्हटलं आहे.
दुपारी पाऊणच्या सुमारास केलेल्या ट्विटमध्ये सोमय्या यांनी दोन फोटो पोस्ट केले आहेत. हा सर्व घटनाक्रम साडेबाराच्या सुमारास घडल्याचं सोमय्या यांनी म्हटलं आहे. वाशिममधील बालाजी पार्टीकल बोर्ड कारखान्याजवळ ही घटना घडल्याचं सोमय्या यांनी म्हटलं आहे.
कालच सोमय्या यांनी ट्विटरवरुन आपण २० ऑगस्ट रोजी शिवसेना खासदार भावना गवळी आणि समूहाचा १०० कोटी रुपयांचा घोटाळा उघड करण्यासाठी तसेच या प्रकरणाचा पाठपुरवठा करण्यासाठी वाशिमला भेट देणार असल्याचं जाहीर केलं होतं. याच भेटीदरम्यान हल्ला करण्यात आल्याचं सोमय्या यांचं म्हणणं आहे. त्यामुळेच त्यांनी ट्विटमध्ये खासदार भावना गवळी आणि १०० कोटींचा घोटाळा या दोन गोष्टींचा उल्लेख केला आहे.
सकाळी वाशिमला पोहचल्यानंतरही सोमय्या यांनी ट्विटरवरुन फोटो पोस्ट केले होते. खासदार भावना गवळी ग्रुपचे १०० कोटींचे घोटाळे, हायवे कंत्राट अडथळे, खासगी कंपन्या, बँका, पोलीस स्थानकाला भेट देणार असल्याचं सोमय्या या ट्विटमध्ये म्हणाले होते. हा हल्ला शिवसैनिकांनी केल्याचा आरोप सोमय्या यांनी केला असला तरी या संदर्भात अद्याप शिवसेनेनं कोणतीही प्रतिक्रिया दिलेली नाही.
