धुळे राजमुद्रा वृत्तसेवा – पत्रकार संरक्षण कायद्याची कठोर अंमलबजावणी करावी, राज्यात पत्रकारांवर खोटे गुन्हे दाखल करून पत्रकारांची कोंडी करण्याच्या घटना वाढीस लागल्या आहेत. पत्रकारांवर गुन्हा दाखल करण्यापूर्वी त्याची सत्यता वरिष्ठ अधिकाऱ्यांमार्फत तपासावी यासह काही मागण्यांसाठी अ.भा. मराठी पत्रकार परिषदेच्या शिष्टमंडळाने आज मुख्य विश्वस्त एस.एम.देशमुख यांच्या नेतृत्वाखाली राज्याचे गृहमंत्री दिलीप वळसे पाटील यांची भेट घेऊन निवेदन दिले असता चर्चा करतांना ना. दिलीप वळसे पाटील यांनी कारवाई करण्यासह सकारात्मक प्रतिसाद देत परिषदेच्या मागण्यांच्या पुर्ततेसाठी मुख्यमंत्र्यांसोबत बैठक लावण्यात येईल असे ठोस आश्वासन शिष्टमंडळास दिले.
आज मंचर जि. पुणे येथे मुख्य विश्वस्त एस.एम. देशमुख यांच्या नेतृत्वाखाली गृहमंत्र्यांना भेटलेल्या शिष्टमंडळात परिषदेचे कार्याध्यक्ष शरद पाबळे, पुणे जिल्ह्याचे अध्यक्ष सुनिल लोणकर, परिषदेचे माजी विभागीय चिटणीस डी. के. वळसे पाटील आदींचा समावेश होता.
गृहमंत्र्यांशी चर्चा करताना एस. एम.देशमुख यांनी राज्यात पुन्हा एकदा पत्रकारांवरील हल्ले मोठ्या प्रमाणात वाढल्याचे सांगितले. गेल्या दोन दिवसात मुंबई, चाकुर, श्रीगोंदा आदि ठिकाणी पत्रकारांवर हल्ले झाले आहेत. या प्रकरणातील हल्लेखोरांवर कठोर कारवाई करण्याची मागणी एस.एम.देशमुख यांनी केली. एक सत्य बातमी दिल्यामुळे केज येथील पत्रकारांवर खोटा गुन्हा दाखल केल्याचे देशमुख यांनी वळसे पाटील यांच्या निदर्शनास आणून दिले. पत्रकारांवर गुन्हा दाखल करण्यापुर्वी त्याची सत्यता वरिष्ठ अधिकाऱ्यांमार्फत तपासून पहावी अशी मागणी देखील शिष्टमंडळाने केली. पत्रकारांचे पेन्शन, आणि प्रश्न प्रलंबित आहेत. पत्रकारांना कोरोना फ्रन्टलाईन वर्कर म्हणून जाहीर करावे आणि ज्या १५५ पत्रकारांचे कोरोनानं निधन झालं आहे अशा सर्व पत्रकारांच्या नातेवाईकांना १० लाख रूपयांचे अनुदान द्यावे आदि मागण्या सातत्यानं सरकारकडे केल्या जात आहेत. परंतू यासंबंधी कोणताच निर्णय होत नसल्याने आपण पुढाकार घेऊन मुख्यमंत्र्यांसोबत बैठक लावावी अशी विनंती वळसे पाटील यांच्याकडे केली असता, मुख्यमंत्र्यांशी बोलून अशी बैठक लावण्याचे आश्वासन त्यांनी शिष्टमंडळास दिले. जवळपास अर्धा तास ही बैठक झाली.
