(मुंबई राजमुद्रा वृत्तसेवा)
मराठी चित्रपट क्षेत्रात नावाजलेली अभिनेत्री सोनाली कुलकर्णी हिच्या घरी अज्ञात चोरट्याने घुसखोरी केल्याची घटना आज सकळी समोर आली आहे. सोनाली कुलकर्णीच्या वडिलांवर अज्ञाताने हल्ला केला असून या विरोधात निगडी पोलिस स्टेशनमध्ये तक्रार दाखल करण्यात आली असून पुढील तपास सुरु आहे.
मिळालेली माहिती नुसार, निगडी प्राधिकरण येथील सेक्टर क्रमांक २५ मध्ये असलेल्या अभिनेत्री सोनाली कुलकर्णी हिच्या घरी अज्ञाताकडून चोरीचा प्रयत्न झाला असून चोरट्याने सोनालीच्या वडिलांवर चाकूने वार केला. यामध्ये ते किरकोळ जखमी झाले आहेत. अजय शेगटे या २८ वर्षीय तरुणाला पोलिसांकडून अटक करण्यात आली आहे.
सकाळी सातच्या सुमारास अजय हा त्यांच्या घरात शिरला त्यावेळी घरी सोनाली यांचे आई वडील होते. चोरीचा प्रयत्न करीत असल्याचे निदर्शनास आल्यानंतर सोनाली यांच्या वडिलांनी त्याला विरोध करण्याचा प्रयत्न केला. त्यावेळी त्याने चाकूने त्यांच्यावर वार केला. यामध्ये ते किरकोळ जखमी झाले. याबाबत परिसरातील नागरिकांना माहिती मिळताच त्यांनी अजयला पकडले. त्यावेळी त्यांच्यातही झटापट झाली नागरिकांनी पोलिसांना कळविताच काही वेळातच घटनास्थळी दाखल झालेल्या पोलिसांनी आजयला ताब्यात घेतले. पुढील तपास निगडी पोलीस करत आहेत. नुकतेच सोनालीचे लग्न झाले आहे.
