मुंबई: शिवसेनेचे फायरब्रँड नेते संजय राऊत यांना पत्राचाळ घोटाळ्यात ईडीने अटक केली होती. 102 दिवस जेलमध्ये मुक्काम केल्यानंतर संजय राऊतांची न्यायालयीन कोठडीतून मुक्तता झाली आहे. यानंतर आता, त्यांनी कारागृहातील आपली अनुभव सांगितले आहे. कारागृहात आपल्याला ‘अंडा सेल’मध्ये ठेवण्यात आले होते. जेलमधील काळात आपले 10 किलो वजन कमी झाल्याचेही राऊतांनी यावेळी सांगितले.
संजय राऊत यांनी एका हिंदी वृत्तवाहिनीला दिलेल्या मुलाखतीत आपला कारागृहातील अनुभव सांगितला. राऊत म्हणाले, कारागृहात आपल्याला ‘अंडा सेल’मध्ये ठेवण्यात आले होते. तेथे आपल्याला 15 दिवस ऊनही दिसले नाही. बराच वेळ जेलमधील फ्लडलाइट्सच्या संपर्कात राहिल्याने आता माझी दृष्टीही कमकुवत झाली आहे, मला वाचण्यासाठी अथवा लिहिण्यासाठी त्रास होत आहे. मला ऐकायला आणि बोलतानाही त्रास होत आहे. मला हे सहन करावे लागले पण ठीक आहे.
…तर अटक झाली नसती
स्वतःला ‘युद्धबंदी’ म्हणत, राऊत यांनी दावा केला, की जर आपण त्यांच्यासमोर आत्मसमर्पण केले असते अथवा ‘मूक दर्शक’ बनून बसलो असतो, तर आपल्याला अटक केली गेली नसती. मी स्वतःला युद्ध कैदी समजतो, सरकारला वाटते, की आम्ही त्यांच्यसोबत युद्ध करत आहोत. आपण माजी गृहमंत्री अनिल देशमुख यांना कारागृहात पाहिले. त्यांची प्रकृती ठीक नाही. सरकार केवळ विरोधी पक्षात असलेल्यांनाच कारागृहात टाकणार का? असा प्रश्नही त्यांनी यावेळी उपस्थित केला. यावेळी आपण जे काही आहोत, ते बाळासाहेब ठाकरे आणि ठाकरे कुटुंबामुळेच आहोत, असेही राऊत यावेळी म्हणाले.
महाविकास आघाडीत फूट पडणार
राहुल गांधी यांनी सावरकरांबाबत केलेल्या विधानावर राऊत म्हणाले, महाराष्ट्रात येऊन वीर सावरकरांवर अशाप्रकारचे आरोप करणं आणि त्यांची बदनामी करणं हे महाराष्ट्राला अजिबात मंजूर नाही. शिवसेना काय तर महाराष्ट्रातील काँग्रेस नेतेही याचं समर्थन करणार नाहीत. राहुल गांधींनी असं वक्तव्य करण्याची काहीच गरज नव्हती. भारत जोडो यात्रा देशातील हुकूमशाही, महागाई, बेरोजगारी या महत्वाच्या प्रश्नांच्या विरोधात निघाली आहे. यात्रेला चांगला प्रतिसादही मिळत आहे. मग अशावेळी वीर सावरकरांचा मुद्दा आणण्याची काहीच गरज नव्हती. यामुळे महाविकास आघाडीमध्ये फूट पडू शकते, असं संजय राऊत यांनी म्हटलं आहे.
