अमरावती : अमरावती पदवीधर मतदारसंघातील अंतिम निकाल तब्बल 30 तासांच्या मतमोजणीनंतर जाहीर झाला आहे. यात महाविकास आघाडीचे उमेदवार धीरज लिंगाडे पाटील यांचा विजय झाला आहे. अत्यंत चुरशीच्या झालेल्या लढतीत लिंगाडे यांनी भाजपचे उमेदवार डॉ. रणजित पाटील यांचा पराभव केला आहे. रणजित पाटील यांचा पराभव हा भाजपसाठी मोठा धक्का मानला जात आहे.
अमरावती पदवीधर मतदारसंघात भाजप उमेदवार रणजित पाटील, काँग्रेस उमेदवार धीरज लिंगाडे आणि वंचित बहुजन आघाडीचे अनिल अमलवार अशी तिहेरी लढत पाहायला मिळाली. या लढतीत मविआ उमेदवार धीरज लिंगाडे यांना पहिल्या पसंतीची मत मिळाली आहे. तर भाजप उमेदवार रणजीत पाटील यांचा पराभव झाला, धीरज लिंगाडे यांना 46344 मतं मिळाली आहेत, तर भाजपचे उमेदवार रणजीत पाटील यांना 42962 मतं मिळाली आहे. धीरज लिंगाडे यांचा 3382 मतांनी विजय झाला आहे.
मविआचा सर्वाधिक जागांवर विजय
महाराष्ट्रातील नाशिक, अमरावती, नागपूर, औरंगाबाद आणि कोकण अशा पाच मतदारसंघातील निवडणुकांचे निकाल जाहीर झाले आहेत. या निवडणुकांमध्ये मविआने सर्वाधिक जागांवर विजय मिळवत भाजपला पराभूत केलं आहे. यात नागपूर, औरंगाबाद आणि अमरावतीमध्ये महाविकास आघाडीच्या उमेदवारांनी बाजी मारली आहे. तर कोकण शिक्षक मतदारसंघात भाजपाचे उमेदवार ज्ञानेश्वर म्हात्रे हे विजयी झाले आहेत. नाशिकमध्ये अपक्ष उमेदवार सत्यजित तांबे यांचा विजय झाला. यामुळे तीन मतदारसंघात मविआला विजय मिळाला आहे.
