मध्य प्रदेशातील पंडित प्रदीप मिश्रा यांनी सीहोर येथील कुबेरेश्वर धाम येथे आयोजित केलेल्या रुद्राक्ष महोत्सवाचा शुक्रवारी दुसरा दिवस आहे. लाखो भाविकांनी सकाळपासूनच रुद्राक्षाच्या दर्शनासाठी रांगा लावल्या होत्या. मात्र, सध्या रुद्राक्ष वाटप बंद करण्यात आले आहे. कार्यक्रमाच्या पहिल्या दिवशी प्रचंड गदारोळ झाला. वाढती गर्दी लक्षात घेता परिस्थिती नियंत्रणाबाहेर जात आहे. त्यामुळे भाविकांनी माघारी परतण्याची गरज आहे.
रुद्राक्षाच्या आशेने लाखो भाविक दिवसभर रांगेत उभे राहिले, पण रुद्राक्ष मिळू शकला नाही. रात्रभर भाविकांची ये-जा सुरू होती. शुक्रवारी सकाळपासूनच रुद्राक्ष धारकांनी पुन्हा धामवर रांगा लावल्या. गर्दी इतकी आहे की पाय ठेवायलाही जागा नाही. घटनास्थळी लाखोंच्या संख्येने लोक उपस्थित असल्याची परिस्थिती आहे. याठिकाणी प्रशासनाने व्यवस्था केलेली आहे. बजरंग दल, विश्व हिंदू परिषदेसह हिंदुत्ववादी संघटनांचे कार्यकर्ते सेवा देत आहेत. मात्र, वाढत्या गर्दीमुळे परिस्थिती प्रशासनाच्या नियंत्रणाबाहेर जात आहे. याठिकाणी एका महिलेचा मृत्यू तर दोन हजारावर भाविकांना रुग्णालयात दाखल करावे लागले आहे. मोबाईल नेटवर्क खंडीत झाले असून, अनेक भाविक बेपत्ता झाले आहेत. त्यामुळे परिस्थितीचे भान ठेवून भाविकांनी माघारी परतण्याचे आवाहन केले जात आहे.
5 लाख रुद्राक्षांचे वाटप
कुबेरेश्वर धाम आणि आसपास सुमारे 10 लाख लोक सध्या उपस्थित आहेत. गेल्या 2 दिवसात सुमारे 5 लाख रुद्राक्षांचे वाटप करण्यात आले आहे. सध्या उत्सवात रुद्राक्षाचे वाटप केले जात नसल्याचे भाविकांचे म्हणणे आहे. बॅरिकेडिंग तोडल्यामुळे समितीने तात्काळ वितरण थांबविण्याचा निर्णय घेतला आहे. आता बॅरिकेडिंग योग्य झाल्यानंतरच पुन्हा रुद्राक्ष वाटप सुरू करण्यात येणार आहे. भोपाळ ते सिहोर या रस्त्याच्या दोन्ही बाजूला 15 किलोमीटरपर्यंत वाहनांच्या लांबच लांब रांगा लागल्या आहेत. वाहने केवळ ताशी 10 ते 20 किलोमीटर वेगाने धावू शकतात. याला कारण म्हणजे कुबेरेश्वर धामला जाणाऱ्या भाविकांची गर्दी रस्त्यावरच आहे. गुरुवारी सुमारे 20 ते 25 जण आपल्या नातेवाईकांपासून हरवले आहेत.
20 लाख भाविकांचा अंदाज
सिहोरचे जिल्हाधिकारी प्रवीण सिंह सांगतात की, शिवपुराण कथेसाठी परवानगी घेण्यात आली होती. समितीने 5 ते 6 लाख लोक येण्याचा अंदाज दिला होता, तरीही आम्ही 10 लाख लोक धामावर जाण्याची आणि बाहेर पडण्याची व्यवस्था केली होती. सकाळपासून गर्दी वाढतच होती आणि दुपारी 12 वाजेपर्यंत सुमारे 20 लाख लोक पोहोचले होते. हा अंदाज दुप्पट आहे. त्यावर नियंत्रण ठेवणे कठीण झाले आहे.
रुद्राक्षासाठी येऊ नका : पं. प्रदीप मिश्रा
कथेदरम्यान पंडित प्रदीप मिश्रा म्हणाले की, रुद्राक्षाच्या लोभापोटी जे येथे येत आहेत, त्यांनी येऊ नये. तिकीट रद्द करा. इथे यायचे असेल तर महादेवासाठी या. त्यांच्याकडून तुम्हाला काय मिळेल याचा लोभ बाळगू नका. रुद्राक्षासाठी येण्याची गरज नाही.
