मुंबई : राज्याच्या अर्थसंकल्पीय अधिवेशनात अर्थमंत्री देवेंद्र फडणवीस यांनी अर्थसंकल्प सादर केला. यात महिलांसाठीही अनेक महत्त्वाच्या तरतूदी करण्यात आल्या आहेत. शिंदे-फडणवीस सरकारनं महिलांना मासिक 25 हजार रुपयांपर्यंतचे उत्पन्न व्यवसाय करमुक्त करण्याचे प्रस्तावित केले आहे. तर एसटी प्रवासात 50 टक्क्यांची सूट दिली आहे.
राज्याच्या अर्थसंकल्पात शिंदे-फडणवीस सरकारने महिलांसाठी अनेक घोषणा केल्यात. महिलांना आता मासिक 25 हजार रुपयांपर्यंतचे उत्पन्न व्यवसाय करमुक्त करण्याचे प्रस्तावित करण्यात आले आहे. यापूर्वी ही मर्यादा मासिक 10 हजार रुपये होती. तर एसटी प्रवासात महिलांना 50 टक्क्यांची सूट दिली आहे. महिला सुरक्षा, सुविधाजनक प्रवासासाठी महिला केंद्रीत पर्यटन धोरण लागू करण्याचीही घोषणा केली आहे. कालच, महिला दिन साजरा करण्यात आला, राष्ट्राची प्रगती ही महिला सक्षमीकरणाच्या आधारे ठरवली जाते त्यासाठी आम्ही चौथे सर्वसमावेशक महिला धोरण घोषित करणार आहोत. मुलींच्या सक्षमीकरणासाठी ‘लेक लाडकी’ ही नवी योजना सुरू करण्यात येईल, अशी घोषणा अर्थमंत्र्यांनी केली.
मुलींच्या सक्षमीकरणासाठी योजना
– यावेळी फडणवीस यांनी ‘लेक लाडकी’ योजनेची घोषणा केली.
– या योजनेनुसार पिवळ्या आणि केशरी रेशन कार्डधारक कुटुंबांतील मुलींना लाभ मिळेल.
– जन्मानंतर मुलीला 5000 रुपये मिळतील.
– पहिलीत 4000 रुपये, सहावीत 6000 रुपये, अकरावीत 8000 रुपये
– मुलगी 18 वर्षांची झाल्यानंतर 75,000 रुपये मिळतील.
अंगणवाडी सेविकांना मानधन वाढ
– आशा स्वयंसेविका आणि गट प्रवर्तकांच्या मासिक मानधनात प्रत्येकी दीड हजार रुपयांची वाढ.
– अंगणवाडी सेविकांचे मानधन 8325 वरुन 10,000 रुपये
– मिनी अंगणवाडी सेविकांचे मानधन 5975 वरुन 7200 रुपये
– अंगणवाडी मदतनिसांचे मानधन 4425 वरुन 5500 रुपये
– अंगणवाडी, मिनी अंगणवाडी सेविका, मदतनीसांची 20,000 पदे भरणार
नोकरदार महिलांसाठी 50 वसतीगृहे
– शहरी भागात नोकरीसाठी आलेल्या महिलांसाठी केंद्राच्या मदतीने 50 वसतीगृहांची निर्मिती.
– अडचणीतील महिलांसाठी, लैंगिक शोषणापासून मुक्त केलेल्या महिलांसाठी, कौटुंबिक समस्याग्रस्त महिलांसाठी ‘शक्तीसदन’ ही नवीन योजना.
– या योजनेत पीडित महिलांना आश्रय, विधी सेवा, आरोग्यसेवा, समुपदेशन इत्यादी सेवा दिली जाईल.
– माता सुरक्षित तर घर सुरक्षित अभियानात 4 कोटी महिला-मुलींची आरोग्य तपासणी, औषधोपचार केले जातील.
