नवी दिल्ली : कोरोनानंतर आता इन्फ्लूएंझा व्हायरस पसरू लागला आहे. या व्हायरसमुळे देशात आतापर्यंत 6 जणांचा मृत्यू झाला आहे. सूत्रांनी दिलेल्या माहितीनुसार, कर्नाटक, पंजाब आणि हरियाणामध्ये H3N2 व्हायरस मुळे मृत्यू झाल्याची पुष्टी झाली आहे. प्राथमिक तपासात ही बाब समोर आल्याचे सूत्रांचे म्हणणे आहे. याबाबत ‘आजतक’ने वृत्त दिले आहे.
दुसरीकडे, कर्नाटकातील हसनमध्ये H3N2 व्हायरस मुळे एका व्यक्तीच्या मृत्यूची पुष्टी झाली आहे. 82 वर्षीय रुग्णाचा मृत्यू झाला आहे. 24 फेब्रुवारी रोजी त्यांना रुग्णालयात दाखल करण्यात आले होते. 1 मार्च रोजी त्यांचे निधन झाले. त्यानंतर त्यांचे सँपल तपासणीसाठी पाठवण्यात आले. 6 मार्च रोजी IA अहवालात H3N2 ची पुष्टी झाली आहे.
लहान मुले आणि वृद्धांना धोका
H3N2 इन्फ्लूएंझाच्या उद्रेकाने देशभरात चिंता वाढवली आहे. इन्फ्लूएंझा प्रकरणे अशा वेळी समोर येत आहेत जेव्हा देश तीन वर्षांनंतर कोरोना महामारीतून सावरला होता. लहान मुले आणि वृद्ध लोक या व्हायरसला मोठ्या प्रमाणात बळी पडत आहेत. डॉक्टरांच्या मते, इन्फ्लूएंझाच्या बहुतेक रुग्णांमध्ये समान लक्षणे असतात. यामध्ये खोकला, घशाचा संसर्ग, अंगदुखी, नाक गळणे याचा समावेश आहे.
एम्सने सांगितली मार्गदर्शक तत्वे
याबाबत वैद्यकीय तज्ज्ञ सतर्क झाले आहेत. त्याच्या उद्रेकाला तोंड देण्यासाठी तो मार्गदर्शक तत्त्वे आणि सूचना देत आहे. एम्सचे माजी संचालक डॉ. रणदीप गुलेरिया यांनी सांगितले की, H3N2 हा इन्फ्लूएंझा व्हायरसचा एक प्रकार आहे, ज्याचे रुग्ण दरवर्षी या वेळी समोर येतात. हा एक व्हायरस आहे जो कालांतराने बदलतो.
अशी घ्या खबरदारी
डॉ गुलेरिया म्हणतात की हा इन्फ्लूएंझा व्हायरस कोविडप्रमाणेच कणांद्वारे पसरतो. फक्त अशा लोकांना सावधगिरी बाळगण्याची गरज आहे, ज्यांना हा आजार आधीच आहे. खबरदारी म्हणून मास्क घाला, हात वारंवार धुवा, फिजिकल डिस्टंन्स ठेवा. तथापि, हे टाळण्यासाठी एक लस देखील उपलब्ध आहे.
