पुणे : पैशांची गुंतवणूक केल्यास दामदुप्पट परतावा देण्याचे सांगून पुण्यातील एका महिलेची तब्बल 35 लाखात फसवणूक केल्याचा प्रकार उघडकीस आला आहे. याप्रकरणी दौंड पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, सुधा साळवे (रा. गजानन सोसायटी दौंड) यांनी फिर्याद दिली आहे. त्यानुसार मोजेस उजागरे (रा. गजानन सोसायटी, दौंड) याच्यावर गुन्हा दाखल करण्यात आला आहे. दि. 3 ऑगस्ट 2022 ते 4 नोव्हेंबर 2022 दरम्यान आरोपीने फिर्यादी यांना पैसे दुप्पट करून देण्याचे आमिष दाखवून वेळोवेळी टप्प्याटप्प्याने 15 लाख 48 हजार रुपयांची रोख रक्कम घेतली. दरम्यान, आरोपीने फिर्यादीकडे पुन्हा पैशाची मागणी केल्यानंतर फिर्यादीने पैसे देण्याचे बंद केले. परिणामी, दिलेली रक्कम परत द्यावी म्हणून मोजेसकडे तगादा लावला.
39 तोळे सोन्याचे दागिने दिले
तेव्हा मोजेस याने आणखी पैशांची मागणी केली. पैसे दिले नाही तर आहे ते पैसे देखील तुम्हाला मिळणार नाहीत. तसेच तुमच्याकडील सोन्याचे दागिने द्या, ते मी गहाण ठेवतो आणि तुम्हाला सर्व पैसे आणून देतो, असे सांगितले. त्यानुसार संबंधित महिलेने मोजेसला 39 तोळे सोन्याचे दागिने दिले. मात्र, रोख रक्कम आणि दागिने अद्याप परत मिळाले नसल्याने संबंधित महिलेने पोलिसात फसवणुकीची तक्रार केली.
