मुंबई : यंदाचा ऑस्कर पुरस्कार सोहळा हा भारतीयांसाठी खास ठरला आहे. कारण ज्युनिअर एनटीआर आणि रामचरण यांच्या RRR चित्रपटातील ‘नाटू नाटू’ गाण्यानं ऑस्कर पटकावत इतिहास रचला आहे. या गाण्यानं बेस्ट ओरिजनल सॉन्ग कॅटेगरीमधील ऑस्कर पुरस्कार पटकावला आहे. या गीताला ऑस्कर मिळाल्याची घोषणा व्यासपीठावरून झाली आणि आरआरआरच्या चमूने एकच जल्लोष केला. संगीतकार एम एम कीरावानी यांनी स्टेजवर जाऊन हा पुरस्कार स्विकारला.
‘नाटू नाटू’ गाण्यानं फक्त भारतातीलच नाही तर जगभरातील प्रेक्षकांची मनं जिंकली आहेत. या गाण्यानं गोल्डन ग्लोब पुरस्कार देखील पटकावला होता. आता या गाण्यानं ऑस्कर पुरस्कारावर आपलं नाव कोरलं आहे. ही भारतासाठी अभिमानास्पद गोष्ट आहे
चित्रपटाने केली 1,224 कोटींची कमाई
आरआरआर हा चित्रपट बनवण्यासाठी 550 कोटी रुपये खर्च करण्यात आले आहेत. या चित्रपटाने जगभरात 1,224 कोटींची कमाई केली आहे. एस.एस. राजामौली यांनी दिग्दर्शित केलेला तेलुगू भाषेतील हा चित्रपट दोन वास्तविक जीवनातील भारतीय क्रांतिकारक, त्यांची काल्पनिक मैत्री आणि ब्रिटिश राजवटीविरुद्धचा त्यांचा लढा याभोवती केंद्रित आहे.
'Naatu Naatu' from 'RRR' wins the Oscar for Best Original Song! #Oscars #Oscars95 pic.twitter.com/tLDCh6zwmn
— The Academy (@TheAcademy) March 13, 2023
या अभिनेत्यांनी साकारल्या भूमिका
या चित्रपटात ज्युनियर एनटीआर आणि राम चरण यांनी 1920 मधील ब्रिटिशकालीन भारतातील स्वतंत्र सेनानी कोमाराम भीम आणि अल्लूरी सीतारामाराजू यांच्या भूमिका साकारल्या होत्या. याशिवाय या चित्रपटात अभिनेत्री आलिया भट्ट आणि अजय देवगण यांच्यासह ब्रिटीश कलाकार रे स्टीवेन्सन, एलिसन डूडी आणि ओलिविया मॉरिस यांच्याही महत्त्वपूर्ण भूमिका होत्या.
