पुणे : स्वस्तात शेत जमीन विकत घेऊन देण्याच्या नावाखाली निवृत्त पोलीस अधिकाऱ्याकडून 60 लाख रुपये उकळले. मात्र संबंधित आणि पैसे परत मागितले असता, त्यांनाच धमकी देत आणखी 6 लाख रुपयांची खंडणी घेतल्याचा प्रकार पुण्यात उघडकीस आला आहे. याप्रकरणी भारती विद्यापीठ पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, आंबेगाव येथील 59 वर्षीय निवृत्त पोलीस अधिकाऱ्याने भारती विद्यापीठ पोलीस ठाण्यात फिर्याद दिली आहे. त्यानुसार पोलिसांनी राजेश अंकुश पोटे, संदेश अंकुश पोटे, प्रियांका नीलेश सूर्यवंशी (सर्व रा. कुदळे पाटील रेसिडेन्सी, वडगाव बुद्रुक) यांच्यावर गुन्हा दाखल केला आहे. हा प्रकार जानेवारी 2015 पासून सुरू होता.
फसवणूक व खंडणीचा गुन्हा दाखल
राजेश पोटे, संदेश पोटे व प्रियांका पोटे यांनी भोर येथे स्वस्त दरात शेतजमीन विकत घेऊन देतो, असे सांगून फिर्यादीकडून 60 लाख रुपये घेतले. मात्र, त्यांना शेतजमीन खरेदी करून दिली नाही. त्यांनी पैसे परत मागितल्यावर आर्थिक नुकसान करण्याची भीती घेतली. तसेच फिर्यादी सहायक पोलीस आयुक्त असताना मार्च 2022 मध्ये त्यांच्याकडून आरोपींनी 6 लाख रुपयांची खंडणी घेतली. या पोलीस अधिकाऱ्याने निवृत्त झाल्यानंतर आता याप्रकरणी तक्रार अर्ज दिला असून, त्यानुसार फसवणूक व खंडणीचा गुन्हा दाखल केला आहे. पोलीस उपनिरीक्षक नितीन शिंदे तपास करीत आहेत.
