अहमदनगर : शिवसेना शिंदे गटाच्या नेत्या आणि अभिनेत्री दीपाली सय्यद कोणत्या ना कोणत्या कारणावरुन नेहमी चर्चेत असतात. आता त्या एका नव्या कारणाने चर्चेत आल्या आहेत. दीपाली सय्यद यांचे पाकिस्तान कनेक्शन असल्याचा दावा त्यांचे माजी स्वीय सहाय्यक भाऊसाहेब शिंदे यांनी केला आहे. अहमदनगर येथे आज शिंदे यांनी पत्रकार परिषदेत हा आरोप केला. शिंदे यांच्या या गंभीर आरोपामुळे चर्चेला उधाण आले आहे.
अभिनेत्री दीपाली सय्यद यांचे पाकिस्तानशी संबंध आहेत. इतकच नव्हे तर दीपाली सय्यद यांनी पाकिस्तानचे नागरिकत्व स्वीकारले आहे, असा गंभीर आरोप भाऊसाहेब शिंदे यांनी केला आहे. दीपाली यांचे पाकिस्तान बँक खाते असल्याचा दावा देखील शिंदे यांनी केला आहे. दीपाली सय्यद यांच्या या संबंधांविषयी भाजपच्या दिग्गजांना माहिती आहे. मात्र आर्थिक हितसंबंधांमुळे त्यांना पाठिशी घालण्याचा प्रकार सुरु आहे, असा गंभीर आरोप भाऊसाहेब शिंदे यांनी केला आहे.
गडकरी, आठवलेंचा पाठिंबा
दीपाली सय्यद यांचे पाकिस्तानामध्ये एक बँक खाते असल्याचा दावा भाऊसाहेब शिंदे यांनी केला आहे. यासाठी दाऊद इब्राहिम याची पत्नी मेहजबिन कासकर हिने मदत केली असून सोफिया सय्यद या नावाने पाकिस्तानी नागरित्व दिले असल्याचा पुरावा भाऊसाहेब शिंदे यांनी पत्रकार परिषदेत दिला आहे. केंद्रीय मंत्री नितीन गडकरी आणि रामदास आठवले हे नेते दिपाली सय्यद यांना पाठीशी घालण्याचे काम करत असल्याचा दावा देखील भाऊसाहेब शिंदे यांनी केला.
भाजप कार्यालयात तोडफोड करणार
दिपाली सय्यद यांच्याबरोबर रामदास आठवले आणि नितीन गडकरी यांचे आर्थिक संबंध आहेत, असा आरोप करण्यात आला. भाजप नेते आणि राज्याचे उपमुख्यमंत्री तथा गृहमंत्री देवेंद्र फडवणीस यांच्याकडे अनेक वेळा लेखी तक्रार करून आणि पुरावे देऊनही दिपाली सय्यद यांच्यावर कारवाई होत नसल्याचे शिंदे यांनी म्हटलं आहे. पुरावे देऊनही कारवाई होत नसल्याने गृहमंत्री देवेंद्र फडवणीस यांना राज्यात फिरू दिले जाणार नाही आणि राज्यातील भाजप कार्यालये तोडफोड करून जाळून टाकू, असा इशाराही भाऊसाहेब शिंदे यांनी दिला आहे.
