छत्रपती संभाजीनगर : उच्च रक्तदाबावर नियमितपणे औषध घेणाऱ्या महिलेने नजरचुकीने उंदीर मारण्याचे विषारी औषध घेतले. ही बाब लक्षात येताच महिलेला तत्काळ परभणी येथील खासगी रुग्णालयात दाखल करण्यात आलं होतं. उपचारादरम्यान महिलेचा मृत्यू झाला आहे. प्रियंका संतोष टेकाळे (रा. वालूर) असे मृत्यू झालेल्या महिलेचे नाव आहे.
परभणी जिल्ह्यातील सेलू तालुक्यातील वालूरमध्ये ही घटना समोर आली आहे. याप्रकरणी सेलू पोलीस ठाण्यात घटनेची नोंद करण्यात आली आहे. पोलिसांनी दिलेल्या माहितीनुसार, प्रियंका टेकाळे यांना उच्च रक्तदाब या आजाराचा त्रास असल्याने त्या नियमितपणे औषध घेत होत्या. दरम्यान, 4 एप्रिलच्या सायंकाळी या महिलेने नियमितपणे घेत असलेल्या बीपीच्या औषधी गोळ्या समजून नजरचुकीने उंदीर मारण्याच्या विषारी गोळ्या घेतल्या. दरम्यान, काही वेळाने प्रियंका यांना उलटी होऊन त्रास सुरू झाला.
आकस्मिक मृत्यूची नोंद
सुरवातीला महिलेला परभणी येथील खाजगी रुग्णालयात दाखल करण्यात आले, मात्र महिलेची प्रकृती चिंताजनक होत असल्याने त्यांना पुढील उपचारासाठी 5 एप्रिल रोजी परभणीहून छत्रपती संभाजीनगर येथे नेण्यात आले. मात्र वाटेतच त्यांचे निधन झाले. याप्रकरणी अनिल टेकाळे यांनी खबर दिल्यावरून परभणीच्या सेलू पोलीस ठाण्यात आकस्मिक मृत्यूची नोंद करण्यात आली आहे. तर पोलीस निरीक्षक रावसाहेब गाडेवाड यांच्या मार्गदर्शनाखाली पुढील तपास पोहेकाँ अशोक हिंगे हे करीत आहेत.
