मुंबई : मुख्यमंत्री एकनाथ शिंदे हे आपल्या 40 आमदारांसह अयोध्या दौऱ्यासाठी रवाना झाले आहेत. शिंदे यांच्या या अयोध्या दौऱ्यात शिवसेना आणि भाजप नेतेही सहभागी झाले आहेत. मुख्यमंत्री शिंदे यांनी संध्याकाळी साडेपाच वाजता मुंबई विमानतळावरुन लखनौकडे उड्डाण केलं. रात्री लखनौमध्ये मुक्काम केल्यानंतर रविवारी (9 एप्रिल) दुपारी ते अयोध्येत राम मंदिरातील महाआरतीत सहभागी होतील. मुख्यमंत्री झाल्यानंतर त्यांचा हा पहिलाच अयोध्या दौरा असल्याने त्याची मोठी तयारी केली आहे. एकनाथ शिंदेंच्या स्वागतासाठी एक दिवस आधीच शिवसैनिक अयोध्येला पोहचले आहेत.
एकनाथ शिंदे गटातील अनेक नेते शिंदे यांच्या सोबत रवाना झाले आहेत. यावेळी त्यांनी विमानात घोषणाबाजी करत मुख्यमंत्र्यांना प्रोत्साहन देत आहे. एकनाथ शिंदे सुमारे 9 तास प्रभू रामाच्या नगरीत घालवणार आहेत. यावेळी ते मंदिराचा आढावा ते घेणार आहेत. त्याचबरोबर शिवसेनेचे मंत्री, खासदार, आमदार यांच्या मुक्कामासाठी मंदिर नगरातील जवळपास सर्व हॉटेल, गेस्ट हाऊस आणि धर्मशाळा बुक करण्यात आल्या आहेत.
भाजपचे चार नेते सहभागी
एकनाथ शिंदे आपल्या सर्व पदाधिकाऱ्यांसह अयोध्या दौऱ्यावर रवाना झाले आहेत. त्याचबरोबर भाजपचे चार महत्त्वाचे नेते शिंदेंसोबत अयोध्या दौऱ्यावर गेले आहेत. ज्यांनी शिवसेनेचं बंड यशस्वी करण्यासाठी उपाययोजना आखल्या ते देवेंद्र फडणवीस यांचे शिलेदार पुन्हा अयोध्येला गेले आहेत. मंत्री राधाकृष्ण विखे पाटील, गिरीश महाजन, संजय कुटे, मोहीत कंबोज हे चौघे अयोध्येला रवाना झाले आहेत.
असा आहे मुख्यमंत्र्यांचा अयोध्या दौरा
मुख्यमंत्री एकनाथ शिंदे अयोध्येसाठी रवाना झाले आहेत. शनिवारी रात्री ते लखनौ येथे मुक्काम करतील. लखनौहून रविवारी (ता. 9) मुख्यमंत्री अयोध्येला हेलिकॉप्टरने जातील. तेथे ते प्रभू राम मंदिरातील महाआरतीमध्ये सहभागी होणार आहेत. महाआरतीनंतर मुख्यमंत्री राममंदिराच्या बांधकामाला भेट देतील. त्यानंतर ते लक्ष्मण किल्ल्याला भेट देतील. तेथील संत-महंतांचे आशीर्वाद घेतील. किल्ल्याला भेट दिल्यानंतर मुख्यमंत्री शरयू नदीवर आरती करणार आहेत. या कार्यक्रमांनंतर रात्री उत्तर प्रदेशचे मुख्यमंत्री योगी आदित्यनाथ यांच्या निवासस्थानी जेवण करतील. त्याच दिवशी मध्यरात्री शिंदे मुख्यमंत्री मुंबईला रवाना होणार आहेत.
