राजमुद्रा : राज्यात विधानसभा निवडणुकीची (Vidhan Sabha Election 2024)रणधुमाळी सुरू झाली असून सर्वच राजकीय पक्षांकडून जोरदार तयारी सुरू झाली आहे. या पार्श्वभूमीवर आताशिवसेना ठाकरे गटाचे (Shiv Sena UBT) प्रमुख उद्धव ठाकरे (Uddhav Thackeray) आज शिर्डी (Shirdi), छत्रपती संभाजीनगरमध्ये येणार आहेत. आज उद्धव ठाकरेंच्या दोन जाहीर सभा होणार असून यातून ते कुणावर तोफ डागणार? याकडे आता सर्वांचे लक्ष लागले आहे.
विधानसभा निवडणुकीच्या पार्श्वभूमीवर उद्धव ठाकरे दौरा करत असलेल्या दोन्ही मतदारसंघात शिवसेनेत बंडखोर झाली होती. ज्यात पैठण मतदारसंघात संदिपान भुमरे तर वैजापूर मतदारसंघात रमेश बोरणारे यांनी एकनाथ शिंदेंना साथ दिली होती. आता उद्धव ठाकरे पैठण आणि वैजापुरात येत असल्याने हा दौरा महत्त्वाचा मानला जात आहे. विधानसभेच्या पूर्वीच ठाकरेंचा हा दौरा होत असल्याने ते कुणावर निशाणा साधणार याकडे राजकीय वर्तुळाचे लक्ष लागले आहे.
उद्धव ठाकरे सकाळी 10 वाजता मुंबईहून खासगी विमानाने शिर्डीला रवाना होणार आहेत. 11 वाजता शिर्डी संस्थान येथे श्री साईबाबांचे दर्शन ते घेणार आहेत. त्यानंतर ते मेळाव्याला उपस्थित राहणार आहेत. दुपारी 1 वाजून १५ मिनिटांनी ते शिर्डीहून वैजापूरकडे रवाना होणार आहेत. त्यानंतर दुपारी 2 वाजून 45 मिनिटांनी ते वैजापूरहून पैठणला रवाना होणार आहेत. सव्वाचार वाजता त्यांचे पैठण येथे आगमन होणार आहे. संत एकनाथ सहकारी साखर कारखान्याच्या कार्यक्रमाला ते उपस्थित राहणार आहेत. याठिकाणी उद्धव ठाकरेंची दुसरी सभा होईल. यावेळी भाजपचे काही मोठे नेते पक्षप्रवेश करण्याची शक्यता आहे. या सभेत ते कोणावर निशाणा साधणार हे पाहणे महत्वाचे ठरणार आहे.
