राजमुद्रा : आगामी विधानसभा निवडणुकीची रणधुमाळी सुरू असताना यंदाचा ठाकरे गटाचा दसरा मेळावा अत्यंत महत्त्वाचा मानला जात आहे. या पार्श्वभूमीवरच आता उद्धव ठाकरेंच्या शिवसेनेकडून धडाकेबाज टिझर प्रदर्शित करण्यात आला आहे..शिवसेना उद्धव बाळासाहेब ठाकरे गटाच्या अधिकृत ‘X’ अकाउंटवरून आज टीजर प्रदर्शित करण्यात आला. यात ‘वाजत गाजत, गुलाल उधळत या!’ असे आव्हान शिवसैनिकांना करण्यात आले आहे. या टीजरमध्ये सुरुवातीला फटाक्यांची आतिषबाजी, ढोल ताशांचा गजर तसेच शिवसेनाप्रमुख बाळासाहेब ठाकरे यांचा व्यासपीठावर उभा असलेला पाठमोरा फोटो पाहायला मिळतो. यात पुढे उद्धव ठाकरे म्हणतात, जर विरोधकांना वाटत असेल कि शिवसेना संपली, त्यांना मला दाखवायचे आहे शिवसेना काय करू शकते.” या टीजरबरोबर कॅप्शनमध्ये “वाजत गाजत, गुलाल उधळत या’ असे आवाहन शिवसैनिकांना करण्यात आले आहे.
उद्धव ठाकरे यांच्या शिवसेनेचा हा टिझर सोशल मीडियावर मोठ्या प्रमाणात शेअर होत असून या टीजरला मोठ्या प्रमाणात लाईक्स आणि रिट्विट करण्यात येत आहे. यंदाहि मुंबई महानगरपालिकेकडून उबाठा गटाला दसरा मेळाव्याची परवानगी मिळाली आहे. त्यामुळे यंदाही दसरा मेळाव्याला शिवतीर्थवर ठाकरेंचा आवाज घुमणार आहे. त्यामुळे यंदाच्या दसरा मेळाव्यात उद्धव ठाकरेंचा रोख कुणाकडे असणार हे पाहणे देखील महत्त्वाचे ठरणार आहे.
आज प्रसिद्ध केलेल्या टीजरमध्ये शिवतीर्थावरील दसरा मेळाव्यातील शिवसैनिकांचा माहोल दाखवण्यात आला असून “शिवगर्जना महाराष्ट्रहितासाठी, महाराष्ट्राच्या रक्षणासाठी, महाराष्ट्रधर्म राखण्यासाठी, ताकद निष्ठावंतांची, परंपरा करारी बाण्याची, शिवतीर्थावर धगधगणार मशाल ठाकरेंची! वाजत गाजत, गुलाल उधळत या!” असे आवाहन टीजरमधून शिवसैनिकांना करण्यात आले आहे.
दरवर्षीप्रमाणे यंदाही शिवसेना उबाठा (Shivsena UBT) गटाचा दसरा मेळावा (Dasara Melava) शिवाजी पार्क येथे आयोजित करण्यात येणार आहे. यावर्षी ठाकरे गटाकडून दसरा मेळाव्याची जोरदार तयारी करण्यात आली आहे.. विधानसभेपूर्वी असणाऱ्या या दसरा मेळाव्याकडे सर्वांचे लक्ष लागले आहे..
