जळगाव राजमुद्रा वृत्तसेवा | महाराष्ट्र राज्यात विक्रीस मनाई असलेला लाखो रुपयांचा अवैध विदेशी मद्याचा साठा राज्य उत्पादन शुल्क विभागाच्या पथकाने जप्त केला आहे. चाळीसगाव तालुक्यातील सांगवी शिवारात रविवारी रात्री उशीरा ही कारवाई करण्यात आली.
राज्य उत्पादन शुल्क विभागाच्या नाशिक, चाळीसगाव, अमळनेर आणि मालेगावच्या पथकाने संयुक्तरित्या ही कारवाई केली. त्यात लाखो रुपयांचे विदेशी मद्याच्या साठ्यासह एक ट्रक असा सुमारे एक कोटी रुपयाचा माल जप्त केला आहे.
प्राप्त माहितीनुसार, चाळीसगाव तालुक्यातील लाखो रुपयाच्या विदेशी मद्याच्या साठ्याची वाहतूक होणार असल्याची माहिती राज्य उत्पादन शुल्क विभागाला मिळाली होती. त्या अनुषंगाने विभागीय उपायुक्त अर्जुन ओहोळ यांनी तात्काळ नाशिक, चाळीसगाव, अमळनेर आणि मालेगाव येथील पथकांना सतर्क करून सापळा रचण्याच्या सूचना केल्या. त्यानंतर चाळीसगाव, औरंगाबाद रस्त्यावर सांगवी शिवारात बोढरे फाट्याजवळ पथके थांबली होती.
रविवारी रात्री उशिरा MP 09 HG 9354 क्रमांकाचा एक ट्रक त्या ठिकाणी आला. या ट्रकची तपासणी केली असता त्यात लाखो रुपयांचा विदेशी मद्याचा साठा आढळून आला. पथकाने याप्रकरणी ट्रक चालक अजय कन्हैयालाल यादव (वय ४१) रा. इंदूर, मध्य प्रदेश याला अटक केली आहे. दरम्यान या कारवाईत राज्य उत्पादन शुल्क विभागाने सुमारे १ कोटी ३ लाख १ हजार रुपयांचा मुद्देमाल जप्त केला आहे. त्यात गोवा राज्यात निर्मित व विक्रीस परवानगी असलेली रॉयल ब्लू मॉल्ट व्हिस्कीच्या १८० मिलीलीटरच्या ६० हजार ४८० बाटल्या मद्य ठेवण्यासाठी असलेले सहा प्लायवुडचे खोके, चालकाचा मोबाईल फोन तसेच टाटा कंपनीचा ट्रकचा समावेश आहे. याप्रकरणी ट्रक चालकाविरुद्ध गुन्हा दाखल करण्यात आला आहे.
