मुंबई | दहशतवाद्यांचा मुंबईतील लोकल आणि वर्दळीच्या ठिकाणी मोठा घातपात घडवण्याचा कट रचण्यात आला होता, अशी माहिती समोर आली आहे. एवढं मोठ कटकारस्थान शिजत असताना त्याची माहिती महाराष्ट्र दहशतवाद विरोधी पथकाला कशी मिळाली नाही? असा सवाल उपस्थित केला जात आहे. . त्यानंतर आता महाराष्ट्र एटीएसने पत्रकार परिषद घेऊन या प्रकरणी आपली भूमिका मांडली. महाराष्ट्र एटीएसचे प्रमुख विनीत अग्रवाल यांनी याबाबत प्रतिक्रिया देताना आपली भूमिका स्पष्ट केली आहे. देशात बॉम्बस्फोट घडवून आणण्याचा मोठा कट दिल्ली पोलिसांच्या विशेष पथकाने उधळून लावला आहे. उत्तर प्रदेश, महाराष्ट्र आणि दिल्लीत दहशतवादी हल्ला करण्याची योजना असल्याचं समोर आलं आहे. या कटात पकडला गेलेला एक अतिरेकी हा मुंबईच्या धारावी येथे राहणारा होता. दिल्ली पोलिसांच्या विशेष पथकाने ही कामगिरी केल्याने महाराष्ट्र दहशवाद पथकाच्या कामगिरी वर प्रश्न उपस्थित केले जात आहे.
अग्रवाल यांनी आपली भूमिका स्पष्ट केली
दिल्ली पोलिसांनी सहा लोकांना अटक केली आहे. त्यापैकी एक हा मुंबईच्या धारावीतला आहे. त्याचं नाव जान मोहम्मद अली मोहम्मद शेख असं आहे. त्याचं पाकिस्तानातील डी कंपनीसोबत संबंध असल्याबद्दलचे अनेक रेकॉर्ड आहेत. जवळपास २० वर्षांपूर्वीचा रेकॉर्ड आहे. आमच्या नजरेत तो होताच. पण दहशतवाद्याच्या कटबाबतची माहिती आमच्याकडे नव्हती. ती सेंट्रल एजन्सीकडे होती. त्यांच्याकडून ती माहिती दिल्ली पोलिसांना दिली गेली होती”, असं विनीत अग्रवाल यांनी माध्यमांशी बोलताना सांगतलं आहे.
