बीड – बीडच्या ईट येथील सहकारी सूतगिरणीला अचानक आग लागली आहे. या आगीत लाखो रुपयांचे साहित्य जळून खाक झाले आहे. ही घटना मध्यरात्रीच्या दरम्यान घडली असून पहाटे उघडकीस आली आहे. ही आग शॉर्टसर्किटने लागल्याची प्राथमिक माहिती वर्तविली जात असून अग्निशामक दलाच्या माध्यमातून आग विझविण्यासाठी शर्थीचे प्रयत्न सुरू आहेत.
बीड तालुक्यातील ईट येथे गजानन सहकारी सुतगीरणी आहे. या सुतगीरणीच्या मालाला परदेशातून मोठी मागणी आहे. या सहकारी सुतगीरणीला मध्यरात्री उशिरा अचानक आग लागलीय. ही आग सुरक्षारक्षकांच्या लक्षात येताच व्यवस्थापनाला माहिती दिली. त्यानंतर बीड व परळी येथील अग्निशामक दलाच्या पाच गाड्या घटनास्थळी पाचारण करण्यात आल्या असून आग आटोक्यात आणण्यासाठी शर्थीचे प्रयत्न सुरू आहेत.
मात्र आगीने मोठे रौद्र रूप धारण केले होते, त्यामुळं सुतगिरणीत असलेल्या मोठ-मोठ्या मशिनरी, सुत आदी लाखों रुपयाचा ऐवज जळून खाक झाल्याची माहिती मिळाली.
