जळगाव राजमुद्रा दर्पण । कृषी उत्पन्न बाजार समितीपूर्वी या निवडणुका होणार असल्याने मतदानाच्या हक्कापासून कुणी वंचित राहणार नाही, असे सहकार विभागाने न्यायालयात नमूद केलेले आहे. जिल्ह्यातील ६२९ विविध कार्यकारी सोसायटींच्या संचालक मंडळाचा कालावधी संपुष्टात आलेला आहे. त्यापैकी अकरा सोसायटींच्या मतदार याद्याही प्रसिद्ध करण्यात आलेल्या आहेत. या संस्थांची निवडणूक प्रक्रिया सुरू करण्यासाठी जिल्हा उपनिबंधक कार्यालयाला राज्य सहकारी निवडणूक प्राधिकरणाच्या आदेशाची प्रतीक्षा आहे.
कृषी उत्पन्न बाजार समितींची निवडणूक प्रक्रिया जिल्हा उपनिबंधक कार्यालयातर्फे सुरू करण्यात आली होती. चाळीसगाव, पाचोरा, अमळनेर, पारोळा, चोपडा व रावेर या सहा कृउबासच्या प्राथमिक मतदार याद्या प्रसिद्ध करण्यात आलेल्या होत्या. त्यावर हरकती देखील मागवण्यात आलेल्या होत्या. जळगाव, भुसावळ, बोदवड, जामनेर, यावल, धरणगाव या सहा कृउबासच्या तात्पुरत्या मतदार याद्या तयार करण्यासाठी गटविकास अधिकारी, सहायक निबंधक व सचिवांना याबाबत पत्र देण्यात आले होते.
जिल्ह्यातील चाळीसगाव, अमळनेर व पाचोरा या तीन कृउबासमध्ये प्रशासक मंडळ कार्यरत आहे. धरणगाव कृषी उत्पन्न बाजार समितीमध्ये प्रशासक तर उर्वरित बाजार समित्यांमध्ये संचालक मंडळ कार्यरत आहे. कृषी उत्पन्न बाजार समितींच्या निवडणुका घेण्यापूर्वी मुदत संपलेल्या विविध कार्यकारी सहकारी संस्थांसारख्या बहुउद्देशीय सहकारी संस्थांच्या निवडणुका घेण्याबाबत उच्च न्यायालयाच्या औरंगाबाद खंडपीठात याचिका दाखल करण्यात आलेल्या होत्या. त्या अनुषंगाने कृउबासच्या निवडणुकांपूर्वी सोसायट्यांच्या निवडणुका घेण्याचे निर्देश देण्यात आलेले आहेत.
बाजार समितींच्या कार्यक्षेत्रातील कृषी पतसंस्था व बहुउद्देशीय सहकारी संस्थांचे संचालक व ग्रामपंचायतीचे सदस्य हे बाजार समितीच्या निवडणुकीसाठी मतदार होणार आहेत. विविध कार्यकारी सहकारी संस्थांसारख्या बहुउद्देशीय सहकारी संस्थेच्या संचालक मंडळातील सदस्य हे बाजार समितीच्या निवडणुकीसाठी मतदार असल्याने ज्या सहकारी संस्थेची निवडणूक झाली नसेल त्या संस्थेचे निवडून येणारे संचालक हे मतदानाच्या हक्कापासून वंचित राहणार नाहीत. बाजार समितीची निवडणूक घेण्यापूर्वी ज्या सहकारी संस्थांचे संचालक बाजार समितीचे मतदार आहे, त्या सहकारी संस्थांचे संचालक हे बाजार समितीचे मतदार आहे.
