पाचोरा राजमुद्रा दर्पण | संध्याकाळ झाली, अजून दिवे लागले नाही, त्यामुळे आजूबाजूचे नागरिक बघण्यास गेले, तर आजी मृत अवस्थेत पडलेल्या दिसल्या.
नगरदेवळा जवळील पिंप्री प्र.भ. येथील वृद्ध महिलेची भरदिवसा घरात घुसून धारदार विळ्याने खून केल्याची धक्कादायक घटना ३१मे रोजी सायंकाळी समोर आली. तेजसबाई पूना जाधव (वय ८०) असे मृत वृद्धेचे नाव असून या प्रकरणी पाचोरा पोलिसांत खुनाचा गुन्हा दाखल झाला आहे. मृत वृद्धेच्या गळ्यावर विळ्याने दोन वार करण्यात आले आहेत. तेजसबाई जाधव यांना दोन मुले आहेत, ते बाहेरगावी नोकरीस असून त्या एकट्याच पिंप्री येथे राहत होत्या. ३१ मे रोजी सायंकाळी ७ वाजेच्या सुमारास घटना लक्षात आली. घटनेची माहिती मिळताच पाचोरा पोलिस ठाण्यातील पोलिस निरीक्षक किसनराव नजनपाटील, घटनास्थळी हजर झाले. १ जून रोजी सकाळी फॉरेन्सिक पथक, श्वान पथक व ठसे तज्ज्ञांनी घटनास्थळी पाहणी करून ठसे घेतले.
तेजसबाई जाधव या घरी एकट्याच राहतात, तर ३१ रोजी सायंकाळी त्यांच्या घराचे दिवे अद्याप लागले नाहीत, अशी माहिती गावातील त्यांच्या नातेवाइकांना कळवण्यात आली. त्यानंतर घराच्या आत जावून पाहिले तर तेजसबाई यांच्या गळ्यावर विळ्याने वार करुन त्यांचा खून केल्याचे लक्षात आले. या प्रकरणी मृत वृद्धेचा भाचा भागवत बळीराम कोळी यांनी दिलेल्या फिर्यादीवरून अज्ञात व्यक्तीविरोधात ४५२, ३०२ प्रमाणे गुन्हा दाखल करण्यात आला. 1 जून रोजी अंत्यसंस्कार करण्यात आले. अधिक तपास पोलिस निरीक्षक किसनराव नजनपाटील यांच्या निदर्शनाखाली सुरू आहे.
