जळगाव- जळगाव शहरातील गजानन कॉलनीतील व्यापाऱ्याला पॅनकार्ड अपडेट करण्याच्या नावाखाली अज्ञात व्यक्तीने २५ हजार रूपयांची ऑनलाईन फसवणूक केल्याचा प्रकार समोर आला आहे. याप्रकरणी जळगाव जिल्हापेठ पोलीस ठाण्यात अज्ञात व्यक्ती विरोधात गुन्हा दाखल करण्यात आला आहे.
पोलीस सूत्रांकडून मिळालेली माहिती अशी की, अभय सुभाष सांखला (वय ४७, रा. मधुबन अपार्टमेंट, गजानन कॉलनी, जळगाव) हे आपल्या परिवारासह वास्तव्याला आहे. व्यापार करून आपला उदरनिर्वाह करतात. ८ डिसेंबर रोजी दुपारी ३ वाजेच्या सुमारास अभय सांखला हे त्यांच्या घरी असताना त्यांच्या मोबाईल क्रमांकावर अज्ञात व्यक्तीने मॅसेज पाठवून बँक खात्याला पॅनकार्ड जोडण्याचे सांगितले.
ओटीपी विचारून ऑनलाईन फसवणूक
त्यानुसार समोरील अज्ञात व्यक्तीने पॅनकार्ड अपडेट करण्याच्या नावाखाली अभय सांखला यांच्याकडून मोबाईलवर ओटीपी विचारून त्यांची २५ हजार रुपयांची ऑनलाईन फसवणूक केली. हा प्रकार घडल्यानंतर त्यांनी मंगळवारी सोमवारी १२ डिसेंबर रोजी सायंकाळी ७ वाजता जिल्हापेठ पोलीस ठाण्यात धाव घेऊन तक्रार दिली. त्यांच्या तक्रारीवरून अज्ञात व्यक्ती विरोधात जिल्हापेठ पोलीस ठाण्यात गुन्हा दाखल करण्यात आला आहे. पुढील तपास पोलीस नाईक शरीफ शेख करीत आहे.
