नवी दिल्ली : देशात गेल्या काही दिवसांपासून बनावट दारुमुळे मृत्यू झाल्याच्या घटना वाढल्या आहेत. बिषारी दारुमुळे बिहारमध्ये दोन दिवसांत चाळीसपेक्षा जास्त जणांचा मृत्यू झाला आहे. त्यामुळे हा या विषयाचे गंभीरता वाढली आहे. राष्ट्रीय गुन्हे रिकॉर्ड ब्यूरो (NCRB)ने एक आकडेवारी जाहीर केली आहे. त्यानुसार गेल्या सहा वर्षात सात हजार जणांना आपले प्राण गमवले आहे. बनावट दारुमुळ मृत झालेल्यांची सर्वाधिक संख्या मध्य प्रदेश, कर्नाटक, बिहार आणि पंजाबमध्ये आहे.
एनसीआरबीच्या आकडेवारीनुसार, बनावट दारु पिल्यामुळे 2016 मध्ये 1,054 जणांचा मृत्यू झाला आहे. तर 2017 मध्ये 1,510, वर्ष 2018 मध्ये 1,365, वर्ष 2019 मध्ये 1,296 आणि वर्ष 2020 मध्ये 947 जणांचा मृत्यू झाला आहे. गेल्यावर्षी म्हणजेच 2021 मध्ये देशभरात बनावट दारु पिल्यामुळे 782 जणांचा मृत्यू झाला आहे. गेल्यावर्षी उत्तर प्रदेशमध्ये बनावट दारुमुळे सर्वाधिक 137 जणांचा मृत्यू झाला आहे. तर पंजाबमध्ये 127 आणि मध्य प्रदेशमध्ये 108 जणांचा मृत्यू झाला आहे.
बनावट दारुमुळे दररोज चार जणांचा मृत्यू
एनसीआरबीच्या आकडेवारीनुसार, 2016 ते 2021 पर्यंत सहा वर्षांच्या कालावधीत बनावट अथवा विषारी दारुमुळे भारतात तब्बल 6,954 जणांचा मृत्यू झाला आहे. म्हणजेच सरासरी देशात दररोज तीन ते चार जणांचा बनावट दारुमुळे मृत्यू झाला आहे. आकडेवारीनुसार, 2016 ते 2021 या दरम्यान बनावट दारुमुळे मध्य प्रदेशमध्ये सर्वाधिक मृत्यूची नोंद झाली आहे. सहा वर्षात मध्य प्रदेशमध्ये बनावट दारुमुळे 1,322 जणांचा मृत्यू झाला आहे. तर कर्नाटकमध्ये 1,013 आणि पंजाबमध्ये 852 जणांचा मृत्यू झाला आहे.
राज्यनिहाय मृतांची आकडेवारी
एनसीआरबीच्या आकडेवारीनुसार बनावट दारुमुळे उत्तर प्रदेशमध्ये 425, राजस्थानमध्ये 330, झारखंडमध्ये 487, हिमाचल प्रदेशमध्ये 234, हरियाणामध्ये 489, गुजरातमध्ये 54, छत्तीसगढमध्ये 535, बिहारमध्ये 23, आंध्र प्रदेशमध्ये 293 आणि पश्चिम बंगालमध्ये 24 जणांचा मृत्यू झाला आहे. नवी दिल्लीमध्ये 116 जणांचा मृत्यू झाला आहे.
