लखनऊ : उत्तर प्रदेशातील महापालिकेच्या निवडणुकीची रणधुमाळी सुरू झाली आहे. मोठ्या राजकीय पक्षांकडून तिकीट मिळवण्यासाठी कार्यकर्त्यांची जोरदार सेटिंग सुरू आहे. यातील काही कार्यकर्ते तिकीट मिळवण्यात यशस्वी होत आहेत. तर काहींना तिकीटापासून वंचित राहावं लागत आहे. भाजपच्या दोन नेत्यांना तिकीट न मिळाल्याने त्यांनी अत्यंत टोकाचं पाऊल उचललं आहे. या दोन्ही नेत्यांनी विषप्राशन करून आत्महत्या करण्याचा प्रयत्न केला. त्यातील एकाचा मृत्यू झाला आहे. तर दुसरा गंभीर आहे. शामली आणि अमरोहा येथील हे दोन्ही नेते असून त्यांना तिकीट न मिळाल्याने प्रचंड टेन्शनमध्ये होते.
शामलीच्या कांधला पोलीस स्टेशनच्या हद्दीतील कांधला नगरपालिकेच्या सभासदपदासाठी एका व्यक्तीला भाजपचं तिकीट हवं होतं. पार्टीने त्याला तिकीट नाकारलं. त्यामुळे त्याने विष घेतलं. तब्येत बिघडल्यानंतर त्याला तात्काळ मेरठच्या रुग्णालयात दाखल करण्यात आलं. उपचार सुरू असताना त्याचा मृत्यू झाला. दीपक सैनी असं त्याचं नाव आहे. तो भाजपचा स्थानिक नेता आहे. दीपकच्या मृत्यूमुळे या परिसरावर शोककळा पसरली आहे. दीपकला निवडणूक लढवायची होती. भाजप नेत्यांनी तिकीट देताना गोलमाल केला. त्यामुळे त्याला तिकीट मिळालं नाही, असं त्याच्या कुटुंबीयांचं म्हणणं आहे.
आईचे गंभीर आरोप
दीपक या जगात नाही यावर स्थानिकांचा विश्वासच बसत नाहीये. दीपक सैनी हा वॉर्ड नंबर 3 नगर पंचायत कांधलाचा यापूर्वी सदस्य होता. दीपकच्या आईने भाजपच्या कांधला नगरपंचायतीचे उमेदवार नरेश सैनी यांच्यावर गंभीर आरोप केले आहेत. आपल्यासमोर दीपकने उभं राहू नये म्हणूनच त्याचा पत्ता कापण्यात आला. यामागे नरेश असल्याचा आरोप दीपकच्या आईने केला आहे.
