जळगाव : कृषी उत्पन्न बाजार समितीसाठी आज मतदानाची प्रक्रीया पार पडत आहे. यात जळगाव कृषी उत्पन्न बाजार समितीसाठी जळगाव शहरातील मतदान केंद्रावर शिंदे गटाकडून बोगस मतदान होत असल्याचा आरोप अपक्ष उमेदवाराने करत राडा घातला.
जळगाव जिल्ह्यातील १२ कृषी उत्पन्न बाजार समित्यांच्या निवडणूक प्रक्रियेत आज मतदान पार पडत आहे. सकाळपासून मतदानाच्‍या प्रक्रीयेला सुरवात झाली असून मतदान केंद्रावर पोलिस बंदोबस्‍त देखील लावला आहे. जिल्ह्यातील काही केंद्रावर मतदानाची प्रक्रीया शांततेत पार पडत आहे. परंतु, काही केंद्रावर गोंधळ उडाल्‍याचे पहावयास मिळाले. यात जळगावातील केंद्रावर बोगस मतदान होत असल्‍यसाचा आरोप अपक्ष उमेदवाराकडून झाला आहे.
मतदान प्रक्रीया बंदची मागणी
जळगाव शहरातील नूतन मराठा महाविद्यालयाच्या मतदान केंद्रावर राडा झाल्‍याचे पहावयास मिळाले आहे. त्यात शिंदे गटाकडून बोगस मतदान होत असल्याचा आरोप करत अपक्ष उमेदवाराने थेट मतदान केंद्रात राडा घातला. तसेच मतदान प्रक्रीया बंद करावयाची मागणी देखील केली. परंतु, पोलिसांनी मध्‍यस्‍थी करत वाद टाळला आहे.
