राजमुद्रा : विधानसभेची रणधुमाळी सुरू झाली असताना लालबागचा राजाच्या (Lalbaugcha Raja Visarjan 2024) पायाशी ठेवलेली चिट्टी राजकीय वर्तुळात चर्चेचा विषय ठरला आहे. आज मंडपात विसर्जन मिरवणुकीची लगबग सुरु असताना कोणीतरी गणपतीच्या पायावर एक चिठ्ठी आणून ठेवली आहे . या चिठ्ठीमुळे आगामी विधानसभा निवडणुकीत ठाकरे गटाचा उमेदवार कोण असणार, याची चर्चा सुरु झाली आहे.कारण लालबागचा परिसर हा शिवडी विधानसभा मतदारसंघात येतो. ठाकरे गटाचे अजय चौधरी (Ajay Chaudhari) हे सध्या शिवडीचे आमदार आहेत. मात्र, लालबागच्या राजाच्या पायाशी ठेवलेल्या चिठ्ठीत सुधीर साळवी (Sudhir Salvi) 2024 ला आमदार होऊ दे, असे लिहण्यात आले होते. त्यामुळे ठाकरे गटाकडून विधानसभेत अजय चौधरी की सुधीर साळवी रिंगणात असणार हे पाहणे मंहत्वाचे ठरणार आहे.
शिवडी विधानसभेमध्ये सध्या अजय चौधरी ठाकरे गटाकडून आमदार आहेत. एकनाथ शिंदे यांच्या बंडानंतर उद्धव ठाकरे यांच्याशी इमान कायम राखणाऱ्या आमदारांमध्ये अजय चौधरी यांचा समावेश होता. अजय चौधरी यांच्यासह सुधीर साळवी देखील शिवडी विधानसभा मतदारसंघातून उमेदवारीसाठी इच्छुक आहेत. लालबागचा राजा सार्वजनिक मंडळाचे सचिव असल्यामुळे लालबाग परिसरात सुधीर साळवी यांना मानणारा मोठा वर्ग आहे. त्यामुळे उमेदवारी कोणाला मिळणार हे पाहणे महत्वाचे ठरणार आहे.काही दिवसांपूर्वीच उद्धव ठाकरे यांनी लालबागचा राजाचे दर्शन घेतले होते. त्यामुळे आता आगामी विधानसभा निवडणुकीत ठाकरे गटाकडून अजय चौधरी आणि सुधीर साळवी यांच्यापैकी कोणाला उमेदवारी दिली जाणार, हे पाहावे लागेल.
सुधीर साळवी हे शिवडी विधानसभा संघटक, दक्षिण मुंबई लोकसभा समन्वयक म्हणून ठाकरे गटाकडून काम करत आहेत. तर लालबागच्या राजाचे मानद सचिव देखील सुधीर साळवी आहेत. त्यामुळे येत्या काही दिवसांमध्ये काय घडणार, शिवडीच विधानसभेचा राजकारण बदलणार का याकडे सर्वांच्या नजरा लागल्या आहेत.
