(पाचोरा राजमुद्रा वृत्तसेवा)
पाचोरा व भडगाव तालुक्यांसह परिसरातील कोरोना रुग्णांची ने-आण करणाऱ्या रुग्णवाहिका तसेच ऑक्सिजन सिलिंडरचे जळगाव येथून पाचोरा, भडगाव व चाळीसगाव येथे वाटप करणाऱ्या वाहनांना मोफत पेट्रोल-डिझेल उपक्रमाचा प्रारंभ पाचोरा येथे खासदार उन्मेष पाटील यांच्या हस्ते झाला. रिलायन्स इंडस्ट्रीज व पाचोरा येथील रिलायन्स पेट्रोलपंपाचे संचालक रूपेश शिंदे यांनी पुढाकार घेऊन या कामाला दुजोरा दिला.
रिलायन्स पेट्रोलपंप पाचोरा यांच्या माध्यमातून कोरोनाग्रस्त रुग्णांची ने-आण करणाऱ्या खासगी व शासकीय रुग्णवाहिका तसेच ऑक्सिजन वाहून नेणाऱ्या वाहनांना दर दिवशी ५० लिटर मर्यादेपर्यंत पेट्रोल किंवा डिझेल रिलायन्स पेट्रोलपंप, पाचोरा येथे मोफत टाकून मिळणार आहे. यासाठी रुग्णवाहिकांना तालुका वैद्यकीय अधिकारी तसेच ग्रामीण रुग्णालयाचे वैद्यकीय अधिकारी यांच्या सहीचे पत्र आवश्यक आहे. या उपक्रमाचा प्रारंभ खासदार उन्मेष पाटील यांच्या हस्ते झाला. कृषी उत्पन्न बाजार समितीचे माजी सभापती सतीश शिंदे, प्रांताधिकारी राजेंद्र कचरे, भाजपचे तालुकाध्यक्ष अमोल शिंदे उपस्थित होते.
खासदार पाटील यांनी रूपेश शिंदे यांचे कौतुक करून या उपक्रमामुळे समाजातील शेवटच्या घटकापर्यंत याचा लाभ होईल व गरजू रुग्णांना कमी खर्चात इतर ठिकाणी जाऊन उपचार घेता येतील, असे सांगितले. भाजपचे तालुकाध्यक्ष अमोल शिंदे यांनी रुग्णवाहिका चालकांना कोरोना रुग्णांसाठी कमी भाडे आकरण्याचे आवाहन केले आहे. तसेच सुरू केलेल्या या उपक्रमाचा जास्तीत जास्त गरजू रुग्णांना कसा लाभ मिळवून देता येईल, यासाठी आपण कटिबद्ध राहू, असे रूपेश शिंदे यांनी सांगितले. तहसीलदार कैलास चावडे, जिल्हा चिटणीस सोमनाथ पाटील, शहराध्यक्ष रमेश वाणी, नगरसेवक योगेश पाटील, पाचोरा तालुका वैद्यकीय अधिकारी समाधान वाघ, पाचोरा, ग्रामीण रुग्णालयाचे वैद्यकीय अधिकारी डॉ. अमित साळुंखे, भडगाव तालुका वैद्यकीय अधिकारी डॉ. प्रशांत पाटील, भडगाव ग्रामीण रुग्णालयाचे वैद्यकीय अधिकारी डॉ. पंकज जाधव, भाजपचे सरचिटणीस गोविंद शेलार, संजय पाटील आदी उपस्थित होते.
