धुळे राजमुद्रा दर्पण l शहरातील वडजाई रोडवरील पावरलुम वर्कशॉप व्यावसायिकाला भर रस्त्यात अडवून त्याच्या खिशातील तीन लाखांची रोकड जबरीने लुटल्याची घटना काल दुपारी घडली. याप्रकरणी चाळीसगावरोड पोलिस ठाण्यात दोघांविरुद्ध गुन्हा दाखल झाला.
साजीद इकबाल मंजुरूल मनान रा.हाजीनगर, इसहाक मशीदजवळ, वडजाईरोड, धुळे या 43 वर्षीय पावरलुम वर्कशॉप व्यावसायिकाने दिलेल्या फिर्यादीनुसार, दि.30 नोव्हेंबर रोजी दुपारी 2.20 वाजेच्या सुमारास शंभरफूटी रोडवरून दूचाकीने मित्र नाजीम बागवान सोबत जात असताना मारिया हॉटेलपुढे मागावून दूचाकीने आलेल्या पप्पू गाय चोर व त्याच्या सहकार्याने अडविले. काही एक विचारणा न करता पप्पू गायचोर याने हाताबुक्क्यांनी मारहाण करीत ‘तु माझ्या विरूध्द केस का केली’ असा जाब विचारत साजीद मनान याच्या पॅण्टच्या खिशातून तीन लाखाची रोकड मारहाण करीत जबरीने काढून घेतली.
या फिर्यादीवरून पप्पु गायचोर व त्याच्या साथीदारावर चाळीसगावरोड पोलीस ठाण्यात भादंवि कलम 327, 323 अन्वये गुन्हा दाखल करण्यात आला. तपास पोहेकॉ. पी. बी. नंदाळे करीत आहेत.
