जळगाव राजमुद्रा दर्पण । जिल्हाधिकारी कार्यालयातील नियोजन भवनात आढावा बैठकीचे आयोजन करण्यात आले होते. जळगाव जिल्ह्यातील सात तालुक्यांतील मानव विकास निर्देशांक उंचावण्यासाठी सात कोटींचा निधी उपलब्ध करून दिला जाणार आहे. या बैठकीत जिल्हाधिकारी अभिजित राऊत, जिल्हा परिषदेचे मुख्य कार्यकारी अधिकारी डॉ. पंकजकुमार आशिया, मानव विकास विभागाचे जिल्हा नियोजन अधिकारी मनोहर चौधरी यांच्यासह विविध विभागांचे प्रमुख उपस्थित होते.
जळगाव जिल्ह्यातील ज्या तालुक्यात मानव विकास निर्देशांक कमी आहे त्या तालुक्यात निर्देशांक उंचावण्यासाठी शिक्षण, आरोग्य व उत्पन्न वाढीच्या योजना राबविण्याचा निर्णय घेतला आहे. चाळीसगाव, चोपडा, जामनेर, बोदवड, मुक्ताईनगर, अमळनेर व एरंडोल या सात तालुक्यांचा यात समावेश आहे. या सातही तालुक्यांमध्ये शिक्षण, आरोग्याचा दर्जा सुधारण्यासाठी मानव विकास विभागाच्या माध्यमातून प्रयत्न सुरू आहेत.
या सात तालुक्यात सायंकाळी सात ते रात्री दहा यावेळेत 157 अभ्यासिका सुरू करण्यात आल्या आहे. तेथे क्रमिक पुस्तकांबरोबरच स्पर्धा परीक्षेसाठी उपयुक्त पुस्तके उपलब्ध करून दिली आहेत. या तालुक्यातील ग्रामीण भागातील मुलींना बारावीपर्यंतच्या शिक्षणासाठी गाव ते शाळादरम्यान वाहतुकीची सुविधा उपलब्ध करून दिली आहे. तालुकास्तरावर बालभवन केंद्र स्थापन करण्यात आले असून मानव विकास निर्देशांक उंचावण्यासाठी विविध योजना राबविण्यात येत असल्याचे त्यांनी सांगितले.
