जळगांव राजमुद्रा दर्पण | शहरातली रोटरी क्लब ऑफ जळगाव वेस्ट तर्फे शनिवार दि.28 मे रोजी सायंकाळी 5 वाजता छत्रपती संभाजीराजे नाट्यगृहात जाहिर व्याख्यान आयोजित करण्यात आले आहे. येथील इस्त्रोचे शास्त्रज्ञ डॉ. आलोक श्रीवास्तव आणि सतिशचंद्र वाणी हे जळगावात येत असल्याची माहिती अध्यक्ष कृष्णकुमार वाणी व प्रा. नंदलाल गादिया यांनी दिली.
इस्त्रोद्वारे संचालित चांद्रयान-1, चांद्रयान-2, इनसॅट इत्यादी यशस्वी मोहिमेमध्ये यशस्वीरित्या सहभाग घेतलेल्या शास्त्रज्ञांचे मार्गदर्शन व समोरासमोर प्रत्यक्ष भेटण्याची संधी जळगावकरांना यानिमित्ताने मिळत आहे. खानदेशात पहिल्यांदाच सर्वांना प्रवेश खुला असलेले व्याख्यान होत असल्याचे त्यांनी सांगितले. व्याख्यान संपल्यावर अर्धा तास खगोलशास्त्रीय प्रश्नांसाठी राखीव असणार असून, तरीही सर्वांनी मोठ्या संख्येने उपस्थिती दर्शवावी असे आवाहन रोटरी वेस्टतर्फे मानद सचिव अनुप असावा यांनी केले आहे.
