जळगाव : कपाशीच्या भावात मोठी वाढ झाल्याने जिल्ह्यात कपाशी चोरीच्या घटना वाढल्या आहेत. पाचोरा तालुक्यातील भोजे येथील शेतकऱ्याच्या शेतातून अज्ञात चोरट्यांनी रात्रीच्या अंधाराचा फायदा घेत सुमारे २५ क्विंटल कापूस लंपास केल्याची घटना घडली आहे. भोजे-वरखेडी रोडवरील राजुरी खुर्द शिवारातील गावाजवळील असलेल्या शेतातील पत्राचे शेडमधून अज्ञात चोरट्यांनी सुमारे २ लाख ५० हजार रूपये किंमतीचा २० ते २५ क्विंटल कापूस चोरून नेल्याचे समोर आले आहे. या प्रकरणी पिंपळगाव (हरेश्वर) पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, शेतकरी देवराम शहादू माळी यांच्या शेतातून कपाशीची चोरी झाली. त्यांनी शेतातील कापूस गावाजवळील चोरट्यांनीच चोरल्याचा संशय व्यक्त केला आहे. शेतकऱ्यांची आधीच कापसाच्या उत्पन्नातही मोठ्या प्रमाणात घट झाली असुन, कर्जाच्या खाईत लोटला जात आहेत. अशातच मोठ्या कष्टाने लावलेल्या कपाशीवर भुरट्या चोरांकडून डल्ला मारला जात आहे. मोठ्या प्रमाणात कापूस चोरून तो खेडाखरेदी धारकांना विकत असल्याचा संशय व्यक्त केला जात आहेत.
शेतकऱ्याने व्यक्त केली शंका…
शेतकरी देवराम शहादू माळी यांनी पिंपळगाव (हरेश्वर) पोलिस स्टेशनला गुन्हा नोंदवितांना पिंपळगाव, शिंदाड, राजुरी, चिंचपुरे, वरखेडी या गावाच्या शिवा लागु असलेल्या त्यांच्या शेतातील कापूस गावाजवळील चोरट्यांनीच चोरल्याची शंका व्यक्त केली आहे. पुढील तपास पिंपळगाव (हरे.) पोलिस स्टेशनचे सहाय्यक पोलिस निरीक्षक महेंद्र वाघमारे यांच्या मार्गदर्शनाखाली हेड कॉन्स्टेबल पांडुरंग गोरबंजार हे करीत आहे.
