जळगाव : ‘हर हर महादेव’ या मराठी चित्रपटावरून बराच मोठा वाद निर्माण झाला आहे. या चित्रपटात चुकीच्या पद्धतीने इतिहास दाखविण्यात आला आहे, असा आरोप होतोय. राष्ट्रवादी काँग्रेसने आयनॉक्स थिएटरमध्ये जावून ‘हर हर महादेव’ चित्रपटाचा शो बंद पाडला. त्याचसोबत चित्रपटगृह मालकांना पुन्हा चित्रपट प्रदर्शित न करण्याचा इशाराही देण्यात आला आहे.
जळगाव शहरातील आयनॉक्स थिएटरमध्ये ‘हर हर महादेव’ हा चित्रपट आज प्रदर्शित होणार होता. परंतु, यास राष्ट्रवादी काँग्रेसनं विरोध केल्यामुळे हा चित्रपट बंद करण्यात आला आहे. महानगराध्यक्ष अशोक लाडवंजारी यांच्या नेतृत्वाखाली बंद करण्यात आला आहे. थिएटरच्या मॅनेजर यांच्याशी चर्चा करून त्यांना चित्रटातील आक्षेपार्ह घटनांची कल्पना देण्यात आली व चित्रपट प्रदर्शित करू नका अशी विनंती राष्ट्रवादी काँग्रेस पार्टी जळगाव महानगरच्या वतीने करण्यात आली.
प्रेक्षकांनी काढलेल्या तिकीटाची रक्कम परत…
आयनॉक्स मल्टिप्लेक्स थिएटरच्या मॅनेजर यांनी विनंती मान्य करत, हा चित्रपट या थिएटरमध्ये प्रदर्शित करण्यात येणार नाही याविषयी आश्वासन दिले. आज प्रेक्षकांनी काढलेल्या तिकिटांची रक्कम त्यांना परत करण्यात आली. या आंदोलनात राष्ट्रवादी काँग्रेस पार्टीचे महानगर अध्यक्ष अशोक लाडवंजारी, सुनिल माळी, अमोल कोल्हे, पुरुषोत्तम चौधरी, इब्राहिम तडवी, रिंकू चौधरी, किरण राजपुत, अनिल पवार, उज्वल पाटील, साजिद पठाण, प्रमोद पाटील, कुंदन सुर्यवंशी, राहुल टोके, हितेश जावळे, भीमराव सोनवणे यांच्यासह कार्यकर्ते उपस्थित होते.
