मुंबई : शिंदे-फडणवीस सरकारने आज शेतकऱ्यांसाठी मोठा निर्णय घेतला आहे. नुकसान भरपाईच्या रकमेमध्ये प्रती हेक्टर दुप्पट वाढ करण्यात आली आहे. यामुळे जिरायत पिकाच्या नुकसानीसाठी 13 हजार 600 रुपये मिळणार आहेत. बागायत पिकांच्या नुकसानीसाठी 27 हजार रुपये मिळणार आहेत. शासनाच्या या निर्णयामुळे अतिवृष्टीत नुकसान झालेल्या शेतकऱ्यांना मोठा दिलासा मिळाला आहे.
राज्यात जून ते ऑक्टोबर महिन्यात अनेक ठिकाणी अतिवृष्टी झाली. त्यामुळे अनेक भागांमध्ये शेतीचं मोठ्या प्रमाणात नुकसान झालं होतं. शेतकऱ्यांना या नुकसानीमुळे प्रचंड मनस्तापाला सामोरं जावं लागलं. राज्य सरकारकडून नुकसानग्रस्त शेतकऱ्यांसाठी मदत जाहीर झाली होती. पण आता शिंदे-फडणवीस सरकारने त्या मदतीची रक्कम दुप्पट केली आहे. त्यामुळे नुकसानग्रस्त शेतकऱ्यांना मोठा दिलासा मिळणार आहे.
किती मिळणार मदत?
राज्य सरकारच्या महसूल आणि वन विभागाने नुकसान भरपाईची मदत दुप्पट करण्याचा महत्त्वाचा निर्णय घेतला आहे. राज्यात आतापर्यंत जिरायतीच्या पिकांच्या नुकसानीसाठी शेतकऱ्यांना 6 हजार 800 रुपये प्रती हेक्टर मदत मिळत होती. पण आता हीच मदत 13 हजार 600 रुपये प्रति हेक्टर इतकी मिळणार आहे. दुसरीकडे बागायती पिकांच्या नुकसानीसाठी 13 हजार 500 प्रती हेक्टर मदत आतापर्यंत दिली जात होती. पण यापुढे हीच मदत 27 हजार प्रतिहेक्टर देण्यात येणार आहेत.
3 हेक्टरपर्यंत मदत मिळणार
बहुवार्षिक पिकांच्या नुकसानीसाठी 18 हजार प्रती हेक्टर मदत दिली जात होती. पण आता यापुढे ही मदत 36 हजार रुपये प्रती हेक्टर देण्यात येणार आहे. एवढच नाही तर शाससाने नुकसानीची मर्यादाही वाढवली आहे. 2 हेक्टरऐवजी 3 हेक्टरपर्यंत मदत मिळणार आहे. सरकारच्या या निर्णयामुळे नुकसानग्रस्त शेतकऱ्यांना कठीण परिस्थितीत नव्याने उभं राहण्यासाठी नक्कीच काहीतरी हातभार लागणार आहे.
