जळगाव : वाळू वाहतूक करणार्‍या ट्रॅक्टरचे टायर फुटल्याने झालेल्या अपघातात चालक ठार झाला आहे. ही घटना आज (दि. ६) शनिवारी पाचोरा भडगाव रोडवरील हॉटेल स्वप्नशिल्प समोर घडली. पवन हिम्मत पाटील (वय २०) असं मृत चालकाचे नाव आहे.
याबाबत सविस्तर वृत्त असे की, पाचोरा तालुक्यातील चिंचखेडा खु येथील रहिवासी पवन हिम्मत पाटील हा ट्रॅक्टरवर चालक म्हणून काम करत होता. पवन हा आई वडीलास एकुलता एक मुलगा होता. शनिवारी पहाटे तीन वाजेच्या दरम्यान गिरणा नदीपात्रातून वाळू भरुन पाचोरा शहराकडे भरधाव वेगाने येत असतांना हॉटेल स्वप्नशिल्प समोर अचानक टायर फुटला. यावेळी त्याचा ट्रॅक्टरवरील ताबा सुटल्याने ट्रॅक्टर चांदवड – जळगाव महामार्गावरील इलेक्ट्रीक खांबावर आदळून पलटी झाले. यात पवनच्या डोक्याला व चेहर्‍याला जबरी मार लागल्याने त्याचा जागीच मृत्यू झाला. पवन यास एक बहिण व वृद्ध आई – वडील असा परिवार आहे.
